أخطاء تربوية 1

النهاردة هتكلم عن خطأ يعد من أكبر وأخطر أخطاء التربية على الإطلاق واللي منتشر مظاهره بوضوح واللي بتتفرع منه أساس مشاكل التربية

وهو “عدم غرس أصول العقيدة الصحيحة “

إن الطفل ميعرفش ويفهم أركان الإيمان ” بالله وملائكته وكتبه ورسله واليوم الآخر والقدر خيره وشره ” وأركان الإسلام ” مش يحفظهم بس

ليه العقيدة ؟ لإنها الأساس احنا خُلقنا لعبادة الله .. ازاى هنعبده صح واحنا مش عارفينه ومش عارفين أمرنا بايه ؟

في طرق كتير أعلم بها طفلي العقيدة أهمها على الإطلاق #القدوة

إنهم يشوفوا العقيدة في أفعالنا ومبادئنا وتعاملاتنا

فاللي بيؤمن بالله بيعبده ويطيعه كما أمره

واللي بيؤمن بمحمد صل الله عليه وسلم رسول الله بيتبع سنته ويمشي على هداه

واللي بيؤمن باليوم الآخر بيتقي الله ويطيعه ويبتعد عما نهاه لكن

إنه يلاقيني بحتفل بأعياد مش موجود في الإسلام

ولا بجهزه لحفلة الكريسماس

ولا مش راضي بقضاء الله

ولا بسب الدين

فده مش هيعلمه العقيدة

لكن أنا هتكلم هنا عن الأخطاء اللي بنقع بها وبتأثر على عقيدة الطفل تباعا في سلسلة #أخطاء_تربوية

والنهاردة هتكلم عن أمر بيهدم العقيدة وبتغفل عنه الأمهات وحقيقي أكثر الأمهات شايفة إنه عادي وشئ ممتع ومفيش منه مشكلة

وهو “””أفلام الكرتون “””

الكرتون اللي ممكن الأم تقعد الطفل ادامه عشان تخلص اللي وراها وهي مش عارفة بيتفرج على ايه ولا بيخزن ايه في عقله

في فترة ما قررت أحلل أفلام الكرتون واشوف مدى فائدتها للطفل

أكثر أفلام الكرتون إن لم يكن كلها صدقا فيها ما لا يعد حصره من مظاهر الشرك ده غير هدم القيم الإسلامية واحتواءها على مظاهر جنسية بشكل مباشر أو غير مباشر وحاليا وصلت لمظاهر الشذوذ وده مش مجال للحديث عنها دلوقتي لكن عشان نوضح مدى خطورتها فعلا

ومظاهر الشرك بداية من عبادة غير الله فنلاقي البنت اللي قررت يبقى لها إله بتعبده وتقدم له قرابين

والدعاء لغير الله بإني ابص لنجمة في السما لما تظهر فاتمنى أمنية عشان تتحقق !

والإستعانة بالجنيات والسحرة اللي هتحل ليا مشاكلي !

والجنيات اللي بيتخلقوا من دمعة طفل

واللي بيصحى من الموت

واللي بيموت حد واللي بيصحي حد من الموت

وغيرها مما لا يعد حصره من مظاهر الشرك بس

ولإننا معتقدين إن “مش وقته نعلمه العقيدة “تحت حجة “لسه صغير ” مع إن رسولنا صل الله عليه وسلم علم الأطفال العقيدة ومع نهج كل الأنبياء وأول وآخر وصاياهم لأبناءهم كانت التوحيد

إلا إننا بنسيبه يبني عقيدته من الكرتون

أنتوا متخيلين قد ايه الانحراف اللي بيوصل لأطفالنا ؟

ازاى نحل المشكلة دي ؟

-نتعلم العقيدة السليمة ونعلمها بطرق بسيطة لأولادنا

-إما إننا نمنع أفلام الكرتون ونستبدلها بقصص الأنبياء وقصص هادفة وده الأفضل للي أقل من ٦سنوات

وإما نتخير كرتون مفيد هادف متزيدش مدته عن ساعة لإن التليفزيون له أضراره على الانتباه واللغة كمان” وده حتى الآن لم أصل له “

وللأطفال الأكبر سنا وبعد غرس العقيدة السليمة الصحيحة ممكن اسمح لهم بالمشاهدة مرة كل فترة بعد تنمية التفكير النقدي ولازم لازم المربي يكون موجود وبيتابع وبيعلق عشان يوجه الأطفال

تلقين العقيدة مش رفاهية ، هى من أهم الأولويات اللي بنعلمها لأطفالنا ولو معلمنهمش أساس دينهم هنعلمهم ايه ؟!

#أخطاء_تربوية

#أمومة_واعية

#أكاديمية_ماما