أخطاء تربوية 3

“متسمعش الأغنية دي ذوقها وحش ومستواها مش راقي “

” البسي الطرحة شكلك هيبقى حلو فيها “

وغيرها من الأمثلة اللي تاهت من عقلي لكثرتها

من الأخطاء اللي بنعملها في تربية أولادنا إننا بنحول الثوابت لأذواق ووجهات نظر فبنخلي المرجعية بتاعتهم هي ذوقي وذوقك ، مش ايه اللي يرضي ربنا

فتلقائيا بنعمل الحاجة على مبدأ “الهوى “

وتلقائيا بنفرغ العبادات من مضمونها الحقيقي

فبنخلي الحجاب جمال للشكل

وبنخلي الصلاة تفريج

وبننسى هدف العبادات الأساسي

وبننسى إننا ” عباد ” لله

كنت حضرت محاضرة والمدرب سأل سؤال للحظة قلت ده سؤال بسيط ولكن بعد كلامه اكتشفت إن ايه ده هو احنا فعلا عارفين (( من هو الله ؟))

معرفتنا عنه إنه اللي خلقنا بس

ولا إنه اللي بيرزقنا ولا معرفتنا عنه إنه رحيم وغفور ولا معرفتنا عنه إننا عباد له

لو احنا عارفينه بحق ، حياتنا هتمشي بناء على معرفتنا دي

فبالنسبة لك وبالنسبة لأولادك ” من هو الله ؟”

ودائما بلاقي إن دي البداية معرفة الله ومن بعد معرفته تعظيمه فتعظيم أوامره دي أول خطوة في التربية الإيمانية اللي من غيرها كل حاجة هتقع

ازاي هنقنع بحلال وحرام ومش بيعظم الله وأوامره ؟

ازاي هخليه يبطل كذب ، الغش ، سخرية ، غيبة ، نميمة

من غير تعظيم الله وأوامره ؟

ازاي هخليه يبر أهله رغم تعاملاتهم من غير تعظيم الله وأوامره ؟

كل حياتنا في الأول والآخر هي ” لله “

كل تفاصيل حياتنا موجودة في منهج ” القرآن “

كل خطوة لها أحكام دقيقة واضحة

خلوا مرجعيتكم دائما القرآن والسنة ، اسألوا نفسكم وأولادكم دائما ” ده يرضي ربنا ولا لأ ” ولو معرفتوش وإن كان الأمر فيه اختلاف ” اسألوا أهل الذكر “

علموهم حب الله

علموهم تعظيم الله

علموهم تعظيم الشعائر

وبعد ما تاخدوا بكل الأسباب توكلوا على الله

دوركم التأثير وليس التغيير

Blog