أخطاء تربوية 6

• اضرب اللي يضربك

جملة منطقية بتقولها الأمهات لأطفالهم عشان يحموا نفسهم لما حد يضربهم لكن هل هي صح 100% ؟؟ وايه مشكلتها ؟؟

مشكلتها إن أول حل بنعلمه للطفل هو استخدام ايده مش عقله فيعيش حياته بنفس المبدأ وبعدين نستغرب عنف أطفالنا حتى معانا ! تخيلي لو أي مشكلة بيقابلها بيبقى حلها بالنسبة له هو الضرب !

مشكلتها إننا بنقول اضرب اللي يضربك في المطلق

طيب لو كان اللي بيضربه أكبر منه مدرسه ، جدته ، ايه العمل وقتها هل هيضربه ؟

• طيب لو كان اللي بيضربه حجمه أكبر وأقوى منه ؟

وتخيلي إننا بنقول لطفل ده ، طفل معندهوش مهارة كافية إنه يتحكم في نفسه وانفعالاته ، وممكن يرد الضرب بضرب أشد أذية فيأذي اللي بيضربه

طيب ايه الحل ؟؟

لازم نعمل وقاية قبل ما نتحط في الموقف ده

بنعلم الطفل ازاي يكون واثق في نفسه وازاي يرد أي اساءة بأدب ، الطفل الواثق من نفسه قوي مش سهل حد يأذيه لكن الشخص المؤذي بيروح للطفل الضعيف اللي مش واثق من نفسه

وده بأمر الله هنفصله في #سلسلة منفصلة

بنعلم الطفل امتى يتجاهل اللي ادامه وامتى يرد بقوة

بنعلم الطفل ازاي يقول لأ بأدب وقوة

طيب لو هو دلوقتي بيضرب هل الحل اسيب ابني كل يوم يجيلي البيت مضروب وممكن يتأذي ؟

أكيد لأ ..

الحل الأول هو إننا نعلمه ازاي يدافع عن نفسه لو اللي ادامه في نفس قوته

لكن لو اللي ادامه أقوى منه بعلمه ازاي يتفادى ده :-

بأنه يكون في مجموعات مع صحابه وميكنش لوحده

بأنه يدافع عن نفسه بطريقة متردش الأذى له

بأنه يصرخ وينادي اللي حواليه ويشتكي للكبير لو لزم الأمر

بأنه ياخد باله من المكان اللي هو فيه وميقررش يجري إلا وهو عارف هيروح فين وهيخرج منه ازاي

والضرب هو آخر أسلوب ممكن نلجأ له لو عارفين انه ينفع مع الشخص المؤذي ومن غير ما يسبب أي أذية لا لطفلنا ولا لغيره و لازم يكون بنفس المقدار ونفس القوة عشان ميتحولش لظلم

مهم جدا نقوي شخصية أطفالنا ونعلمهم ازاي يدافعوا عن نفسهم عشان ميكونوش ضعفاء مش واثقين من نفسهم قبل ما نعلمهم يضربوا اللي بيضربوهم