أنا مستحقش أكون أم

أنا مستحقش أكون أم

أنا أم قاسية

أنا أم فاشلة

أنا مينفعش أكون أم

أنا مقصرة مع أولادي

أنا مبعملش حاجة ولا ليا دور معاهم

وكتير من الأفكار اللي بتيجي في بال كل أم كل يوم بعد ما ينام أولادها بعد يوم مرهق متعب لها

متخليش حكمك على نفسك قاسي ومتخليش تعاطفك مع نفسك ينسيكي أخطاءك

وازني واعرفي قدراتك صح

لازم تستعيني بالله

اعرفي إنك مش بتربي لكن الله هو من يربي

مفيش تربية من غير الاستعانة بالله

مفيش تغير من حال يسوءك لحال يرضي الله ثم يرضيكِ إلا بالله

مفيش طاقة ولا قوة في شئ بتعمليه أو هتعمليه إلا بالله

لا حول ولا قوة لك إلا بالله وحده

رسخي جدا المعنى ده جواكي وهتلاقي أمورك متيسرة معاهم

ادعي دائما يعينك على تربيتهم ويغفر لكي تقصيرك معاهم ويجبر تقصيرك

اعرفي قدراتك

أنتي مش خارقة أنتي بشر

طبيعي هتتعبي

طبيعي هتزعقي وترجعي تندمي

طبيعي هتغلطي وترجعي تصلحي غلطك

هوني على نفسك

كل ده طبيعي يفلت منك في رحلة تغييرك لنفسك وبقدرتك كبشر أنتي مش مثالية ولا كاملة لكن اللي مش طبيعي هو إنك تكملي وتبرري لنفسك من غير إصلاح

تقبلي ضعفك أنتي بشر

تفقدي مواطن الخلل

و#ركزي على مواطن القوة

اعرفي امتى بتتعصبي ؟ اعرفي امتى بتحسي إنك أم فاشلة ؟

في أمهات بتتعصب لما بتكون مضغوطة ودول محتاجين يتعلموا إدارة مشاعر وضغوط

وفي أمهات بتتعصب لما تكون تعبانة ومرهقة ودول محتاجين يدوا نفسهم حقها ويرتاحوا من رحلة اليوم المرهقة جدا ويطلبوا المساعدة

وفي أمهات بتتعصب لأنها عاوزة نظام والطفل لسه بيكتشف وقالب البيت محتاجين تفهم لطبيعته وتعامل صح

وفي أمهات بتتعصب عشان مشاكل مع زوجها محتاجة تتعلم ازاي تفصل

دوري على الأسباب اللي بتوصلك لكده واعرفيها

أنتي مش طول الوقت بتتعصبي ومش طول الوقت مبتعمليش معاهم حاجة

أنتي لو رصدتي اللي بتعمليه في اليوم هتعرفي إنك بتعملي انجازات كتير معاهم

زي ما بتشوفي عيوبك شوفي انجازاتك معاهم

واستغفري على أخطاءك ( إن الحسنات يذهبن السيئات )

وقفي جلد لذاتك

كل اللي فوق ده مش هتعرفي تعمليه طول ما بتجلدي نفسك

أنتي بتعملي اللي تقدري عليه وتقولي يارب تقبل مني

أنتي بتحاولي وتدوري وتتعلمي وبتقعي وبترجعي تصلحي تاني

حاولي تخلي احساسك بالذنب يحركك لادام ميرجعكيش لورا

متخليش جلدك لنفسك يوقفك اعرفي إنك بشر تقبلي ده وقومي كملي

دائرة دعم

خلي حواليكي ناس يدعموكي لما تقوليلهم أنا غلطت يطبطبوا عليكي ويفهموا إنك أصلا حاسة بالذنب وبتجلدي نفسك لوحدك فيرفقوا بكي

لما تقولي اتعصبت النهاردة يقولولك معلش غصب عنك بس بكرة هتحاولي تاني

بلاش تسمعي للي يقولك ابنك هيطلع عصبي زيك ولا اللي يجلد فيكي في الوقت اللي أنتي حرفيا مش مبطلة جلد فيه لنفسك لأن ده هياخدك لسكة تانية خالص ومش هيخليكي تتحركي لادام

اعرفي إنك أم ومكانتك عالية جدا في الإسلام ولكي توصية خاصة جدا متخليش حد يقلل مكانتك دي وادعي دايما يعينك عليها

أنتي مش فاشلة

أنتي أم مُرهَقة

هوني على نفسك

و توكلي على الله