إليكِ

محدش هيحب وهيخاف على ابنك \ بنتك زيك

أنتي أمه

العالم كله لهم

الأمان الوحيد في حضنك

أول حد اتعرف عليه هو أنتي

أول خبطة لمستك

أول حد اطمن له هو أنتي

استحملتي تعب كتير عشانهم

تعبتي في حملهم وكنتي مبسوطة بتعبك بس عشان تشوفيهم

كنتي بتموتي من القلق في كل لحظة مبتحسيش بخبطتهم في بطنك

اهتميتي بنفسك وبصحتك عشان صحتهم

استحملتي أدوية الحمل ووجعها المميت عشانهم

استحملتي ألم الولادة وجرحك المفتوح ومكنش فارق معاكي غير إنك تشوفيهم بخير

اهتميتي بأكلك وشربك عشان ترضعيهم كويس

أنتي اللي كنتي سهرانة بهم وأنتي اللي لو نمتي تقومي كذا مرة عشان بس تطمني عليهم

وأنتي اللي كنتي بتتفنني في الأكل عشان يأكلوا

اتعلمتي ليل نهار عشان يكونوا بصحة أفضل

وبتعرفي مالهم وعاوزين ايه بمجرد ما تبصي لهم

وتجاهلتي كلام كتير عشان أنتي بس اللي تعرفيهم وتعرفي الأنسب لهم

مهما تعبتي مرة ولا حاولتي تفصلي شوية من كتر تعبك فبتعملي ده برده عشانهم عشان تقومي وتكملي تاني معاهم بكل حب

أنتي بشر متلوميش نفسك أبدا إنك تعبتي ، لومي نفسك بس لو كملتي على ده

اوعي حد يحسسك إنك مبتعمليش حاجة ولا إنك أم فاشلة وسايبة عيالك ولا تصدقي إن حد هيحب عيالك أكثر منك

أنتي أم مُكرمة في الإسلام ،مكانتك عالية جدا لا يمكن حد ياخدها ولا في بديل لكي ولا حد هيخاف عليهم قدك ولا يقدر يضحي بحياته زيك

مهما تعبتي مهما وقعتي استعيني بالله وقومي تاني وكملي رسالتك وطريقك معاهم

Blog