ازاي تعلمي ابنك التعامل مع الأزمات في 3 خطوات ؟؟

تعبتي في مرة وبنتك هي اللي ساعدتك رغم صغر سنها ؟

مريتي بإن تحصل حاجة في البيت وابنك هو اللي ينقذك ؟

في حياتنا بتقابلنا طوارئ كتير

أم تعبت فجأة واغمى عليها

لاقدر الله حصل حريق مفاجئ

تعب الأم لفترة طويلة

وبلطف ربنا بنلاقي الأطفال سبب في انقاذ الموقف بتصرف بسيط

ازاي ممكن نعلم أولادنا يتعاملوا في الطوارئ والأزمات في ٣ خطوات ؟

⁦

⁩ نمي عندهم الثقة بالنفس وقيمة الاستقلال :

كل ما كان الطفل واثق في نفسه عارف نفسه وإمكانياته كل ما كان عنده قدرة أسرع على التصرف لكن الطفل الغير واثق بتلاقيه متلخبط تايه بيلجأ للعياط لعجزه عن التصرف

قيمة الاستقلال مهمة جدا جدا : في إنك تبدأي تعلمي طفلك يعتمد على نفسه في الحاجات المناسبة لسنه

يحضر هدومه لنفسه

يحضر أكله

يذاكر لنفسه

على الرغم من إننا ممكن نشوف الحاجات دي بسيطة إلا إن مفعولها قوي جدا في اعتماده على نفسه وقت الأزمة

فلو تعبتي في يوم هتلاقي طفلك قايم لوحده بواجباته اللي كنتي بتعمليها بالنيابة عنه ظنا إنه لسه صغير

⁦⁦

⁩ علميهم مهارة حل المشكلات

لما تواجهه مشكلة ولو بسيطة علميه ازاي يفكر ويحل المشكلة بنفسه مرة على مرة هتقوى عنده المهارة فلما يحتاجها في المواقف الكبيرة يقدر يتصرف

يعني جربي لو حد ضايقه تتكلمي معاه وتسأليه حاسس بايه ؟ في حاجة حصلت من زميلك ؟ طيب هتتصرف ازاي ؟ وسبيه يفكر ولو معرفش اقترحي عليه بدائل ممكن تسأله هو عمل كده ؟ تفتكر ممكن تعمل ايه ؟ وخليه يقترح عليكي.

⁦

⁩ اخلقي أزمات وهمية

من التجارب اللطيفة جدا لأحد الآباء إنه قرر يعلم أولاده لو لاقدر الله الأم تعبت ازاي هنتعامل ، واتفق مع الأم والأولاد على تمثيل الموقف .. الأم اخدت أجازة من شغل البيت أسبوع

والأب وزع الأدوار عليه وعلى الأولاد وكل واحد ممكن يعمل ايه من غسيل مواعين وطبخ وشراء الأكل والميزانية وبفضل الله كانت تجربة ناجحة جدا اتعلم فيها الأولاد مهارات كتير

اللي مطلوب مننا هو إننا نخلق أزمات وهمية ونتفق مع أولادنا ونعلمهم ازاي يتعاملوا ومهارات كل أزمة ونسيبهم يتعاملوا ونصحح لهم وقتها أي خطأ بمتابعتنا لهم

والأزمات اللي مينفعش نخلقها ممكن نمثلها في قصص ومواقف تمثيلية ونخليهم يفكروا ازاي ممكن يتصرفوا وقتها

متستهونوش بالمهارة دي .. المهارة دي خلت أولاد يتحملوا مسئولية ويعتمدوا على نفسهم ، وخلت بنات تنقذ أمهاتهم اللي كانوا ممكن جدا يموتوا لو محدش أنقذهم لولا لطف الله بهم ، وخلت أمهات تعرف قدرات أولادها

تفتكروا ايه الأزمات اللي ممكن ندرب عليها أولادنا ؟