الأنماط السلوكية ( البطئ الهادئ )
النوع الثاني البطئ الهادئ الشخص الراااااايق جدا 😎
من اسمه كده باين بطئ وهادي
🔷ازاي اعرف ابني شخصيته بطيئة ؟
صدقيني هتعرفي لوحدك 😁 بس تعالي اقولك شوية صفات وازاي تتعاملي معاه
1⃣قدرته على النشاط الحركي ضعيفة ، عكس النشيط تماما لا بيبقى عاوز يجري ولا يتنطط فمتتوقعيش إنه يلعب أنشطة عاوزة طاقة ، اللي هو تحسيه كسول في نفسه بس هو مش كسول دي طبيعته ،هتلاقيه بيحب اللعب الهاااااادي والصامت ولما بيقعد يخلص حاجة أو يلعب ياخد ركن هادي كده ويخلصها في هدووووء تام اللي غالبا مش هتحسي به
2⃣ ونتيجة لإنه بطئ وبياخد وقت كبير جدااااا عبال ما بيخلص أي حاجة بيعملها ولو في مذاكرة مثلا 📖ممكن يقعد ساعتين في مادة أو اليوم كله فهتلاقيه بيحبط بسرعة جداااااااااا وخصوصا لو سمع كلام من نوعية “أنت بطئ ، انجز ، أنت غبي ، بسرعة اهي كلمة بسرعة دي بتوتره جدا وفي أمهات بتجيب من الآخر فتقوله أنت مش هتنفع كده في حاجة .. فمينفعش في حاجة فعلا بس كده ؟ اه والله 😀
فبراحة عليه واديله وقته وبرده هنقول نقنن ده ازاي
2⃣ وبما إنه برده بطئ فبيتعلم أي مهارة في وقت كبير جدااااا وغالبا بطئه نتيجة إنه عاوز يعملها بأحسن صورة ونتيجة البطء ده بمقارنة اللي في سنه بيقتل ثقته في نفسه لأنه واعي للي بيحصل حواليه وشايف زمايله بيخلصوا وهو لسه وبيزيد الموضوع مع تعليقات اللي حواليه “شوف فلان خلاص وأنت لسه ” فتضيع الثقة خالص 😒
وفي أطفال لطيفة جدا هترمي على طول الحاجة عليكِ ، بما إني مش عارف اخلصها فأنتي هتخلصيها أحسن مني فيتعود إنه ميتحملش مسئولية أصلا وتضيع عندي قيمة الاستقلال 😐
الموضوع بيبقى أسوء مش بس مع ” الأم النشيطة ” لا كمان مع “الأم المثالية ” اللي مش بس بتطالبه بسرعة الأداء لا بتطالبه يعمله زي ما هي عاوزة بالضبط
لكن لو عرف طريقة عمل حاجة بيقدر ينجزها ويتقنها جدا
3⃣ عنده مشكلة في التغيير وبياخد وقت كبير عبال ما يتعود عليه
4⃣ على الرغم من بطء تعلمه اللي ممكن يحسسك إنه مش فاهم حاجة إلا إنه بعد ما بيتعلم الحاجة بيتقنها وممكن يبدع فيها وعنده جودة عالية في اللي بيعمله
🔷 طيب نتعامل معاه ازاي ده ؟
1⃣ اتفقنا إنه طفل هادي وبيحب الأنشطة الهادئة فاستثمري ده في إنك تعلميه أنشطة هادية زي القراءة أو الرسم هيبدع فيهم
2⃣ وبما إنه بطئ فمفتاحه ” التشجيع ” كل ما شجعتي كل ما أداءه هيبدأ يتحسن
ومهم جدا في أي مهمة يبقى معانا ده ⏳⏰ وتعلميه كل مرة يقلل من وقت مهمته بقدر بسيط لغاية لما يوصل لوقت معقول ومتتوقعيش انجازه بسرعة ومتحبطيش ومتنسيش “التشجيع ” 👏
3⃣ مينفعش ترميه في البحر 🏊وتتوقعي إنه هيتعلم العوم
هيغرق 😶
لازم تشرحيله الحاجة الجديدة اللي هيعملها ده لو عوزاه ينجز فعلا
لكن لو ادتيله مهمة جديدة عليه وسبتيه فتوقعي إنه هيقعد كتير عبال ما يفهم ازاي ممكن تتعمل ورغم إن ده بياخد وقت كبير إلا إنه انفع له في تنمية مهاراته واعتماده على نفسه
4⃣ نمي ثقته بنفسه ركزي على مميزاته ومتقارنهوش بأي حد غير نفسه كل ما يتقدم وريله قد ايه هو اتقدم وبقى أحسن من نسخته القديمة ولو كانت بقدر بسيط هتفرق معاه وعلميه إن كلنا مختلفين وكلنا فينا مميزات وعيوب المهم أننا نستثمر مميزاتنا ونزكي عيوبنا ” من زكاها ”
5⃣ علميه التخطيط اليومي بشكل مبسط
لو طفل صغير خلي الروتين اليومي له عبارة عن صور لمهامه الأساسية اللي بيعملها في اليوم وكل مهمة لها وقتها
ولو طفل أكبر خليها كتابة
عشان يبقى مستوعب إن كل حاجة لها وقتها ولو حصل أي تغيير وضحي ده له واشرحيله ده
6⃣ متقعيش في فخ إنك تشيلي المسئولية عنه ، سبيه وشجعيه ومع الوقت هيتقدم معاكِ
7⃣ اتأكدي إن ابنك فعلا بطئ مش أنتي اللي سريعة زيادة
8⃣علميه التخطيط المسبق
لو هيروح المدرسة بكرة علميه يحضر هدومه وأدواته وشنطته من بليل
9⃣ بلاش مفاجآت ولا ضغوط هيتوتر وتبوظ الدنيا لكن عشان نكون واقعين هنحتاج نعلمه ازاي يدير الضغوط بطريقة صح أو يتعامل مع الأزمات والمفاجآت
كده خلصنا النمط التاني وهو نمط لطيف سهل التعامل معاه لو فهمنا طبيعته ووجهناها صح.
#الأنماط_السلوكية
#أمومة_واعية
#أكاديمية_ماما
مقالات قد تهمك ☺
طفل السنة اعلمه ايه ( التربية العفيفة )
طفل السنة اعلمه ايه ( المهارات الحركية )