الأنماط السلوكية ( سريع الاندماج )

ومكملين مع بعض رحلتنا مع أنماط الأطفال

النوع الرابع الطفل السهل سريع الاندماج

طفل مريح وسهل ، طبعهم سهل ، مزاجهم حلو واجتماعي ومتعاون

لكن مفيش حد فيه مميزات من غير عيوب

فتعالوا نتكلم شوية عن الشخصية دي ومميزاتها وعيوبها

 

🔷 ازاي اعرف إن ابني الشخصية دي ؟

⁦1⃣⁩ هو طفل اجتماعي ، بيندمج بسرعة مع الناس ،هتلاقيه بيسلم على ده وبيتكلم مع ده وبيصاحب وبيكون صداقات بسرعة و بكل سهولة ورغم إن دي ميزة كويسة إلا إنه أكثر نمط عرضة للإستغلال ولأصدقاء السوء ومحتاج يعرف عواقب الأمور

⁦2⃣⁩ عنده مرونة عالية ، سهل جدا إنه يتنقل من نشاط لنشاط ،معندهوش مشكلة مع التغيير المفاجئ بيتقبله ويتكيف مع الوضع ودي ميزة إنه يقدر يبقى عنده خبرات كتير لإنه بيعمل أنشطة كتير لكن خلي بالك عشان ميتشتتش

⁦3⃣⁩ سهل يتأقلم على أي وضع جديد وعلى أي شخص جديد بس محتاج يتأنى وميستعجلش

⁦4⃣⁩ بيتعلم مهارات كتير بسهولة فبيبقى عنده خبرة عالية ، وبيحب الأنشطة اللي بتنمي مهاراته العقلية

⁦5⃣⁩ بيرضى بالقليل ، ومبيطلبش ومبيعلنش احتياجه

⁦6⃣⁩ طفل سهل ولين ومتعاون ومتسامح جدا

⁦7⃣⁩ طفل هادي مشاكله قليلة ، مطيع سهل اقناعه لكن خلي بالك عشان بيميل للضعف.

 

🔷 ازاي نتعامل مع الشخصية دي ؟

👈 بعلمه الفرق بين الصديق الكويس وصديق السوء وازاي يختار صحابه بدقة

👈 بعلمه دوائر العلاقات مين يتحط كصديق ومين يتحط شريك ترفيه ومين يتحط صحبة صالحة ومين يتحط زميل ومين علاقة سطحية ومين نقطع علاقتنا معاه

👈 بعرفه حقوقه في العلاقات وازاي يطالب بها بهدوء وثقة

👈 بعلمه يدافع عن نفسه ويطالب بحقوقه من غير خوف ، بعلمه يتكلم بصوت فيه ثقة

👈 بعلمه معنى التسامح الصح والفرق بينه وبين الضعف

👈 لأنه مبيطلبش فده مش معناه إني اهمله ، بالعكس لازم اعرف احتياجاته وطلباته لأنه غالبا مش هيتكلم
ومفيش مانع اعلمه يطلب احتياجه بالتدريب واعلمه ازاي يعبر عن مشاعره

👈 وفري له وقت للكلام ، متتوقعيش إن كل حاجة ماشية كويس لأنه سهل ،كل ما اتكلمتي معاه كل ما عرفتي تكتشفي احتياجه بدري

👈 الأنشطة اللي بيتنقل بينها بسهولة خليها مثمرة ومفيدة له وعلميه التنظيم والتركيز

👈 وفري له أنشطة وألعاب عقلية زي الألغاز

👈 اشتغلي على ثقته بنفسه لو حسيتي منه بضعف.

 

 

#أمومة_واعية
#أكاديمية_ماما