الأنماط السلوكية للأطفال ( النمط النشيط )
ابني ده مش زي أخوه
كام مرة سمعتي الجملة دي ؟ وكام مرة قلتي الجملة دي ؟
لأننا اتخلقنا مختلفين .. أطفالنا كمان مختلفين
وعشان نعرف نتعامل معاهم لازم نعرف كل نمط منهم وازاي اختلافهم بيميزهم
في سلسلة #الأنماط_السلوكية هنتكلم عن كل نمط سلوكي وايه بيميزه وايه عيوبه وازاي نتعامل معاه وايه المهارات اللي هنحتاج ننميه
الطفل النشيط
والنوع ده ما شاء الله عندنا منه كتير ونسبته كبيرة والحمد لله 😀
🔷طيب ازاى اعرف ان شخصية ابنى من النوع ده ؟
1⃣عنده طاقة زايدة اللي هو هتلاقيه بيحب يجري ويتنطط وميحبش يقعد بهدوء زي الطفل الهادي بس لو طلبتي منه ده ممكن يعمله عادي
2⃣لما يجي وقت الرعب 👻 أقصد المذاكرة 😎 هتلاقيه مش بيقعد لفترة طويلة عشان كده هيحتاج تقسمي له وقت المذاكرة وبين كل وقت والتاني راحة قليلة عشان يقدر يكمل معاكي بسلام وطبعا المكان ميكنش في أي مشتتات خالص وطبعا معاكي سلاحك 🔫 لا مش الشبشب👡 الساعة
ومهم بعد كده إنك تقللي وجودك معاه عشان يعتمد على نفسه فيما بعد
ولو موضوع المذاكرة صعب عليكي اتفرجي على حلقات الذكاءات لماجد سعيد واعرفي نمط ابنك عشان تعرفي تتعاملي معاه
https://youtu.be/oamcvL829uk
2⃣ بيبقى صعب إنه يتعود على أي وضع جديد بسرعة زي إنه ينام في ميعاد معين ويصحى في وقت محدد ، مهم جدا تعمليله روتين نوم
👈 ممكن دش دافي
👈 إضاءة ضعيفة وصوت هادي ” الطفل من صغره لازم يفرق بين الليل والنهار ” ويفضل وقت نوم الطفل يكون وقت نوم اللي في البيت لإن صعب الطفل يتعود على حاجة اللي حواليه بيعملوا عكسها
👈 قصة قبل النوم ونراعي تكون فيها قيم ومبادئ أو قصص للصحابة أو مقتطفات من سيرة الرسول صل الله عليه وده قبل ٧ سنوات بتبقى بشكل قصصي
👈 ومتنسيش أذكار النوم
3⃣ بيمل بسرعة ودائما هتلاقيه بيدور على نشاط جديد لدرجة إنك هتفتكري إنه عنده تشتت انتباه من كثر ما بيسيب حاجة ويروح لغيرها
ده لازم تعلميه الصبر عشان يتعلم اتمام المهام ومتخليش ادامه أنشطة كتيرة عشان ميتشتتش ويقدر يكون مركز خلي ادامه نشاط واحد ولما يخلصه يغيره
🔷ازاى نتعامل معاه بقى ؟
1⃣- هو دلوقتى عنده طاقة كبيرة فـ خرجيها فى إنه مثلا يشترك فى النادى ،، أو يلعب رياضة ،، خرجيه يجرى في مكان واسع
استثمري طاقته في شئ مفيد له
2⃣- جربى الأشياء اللى بتخفف من نشاطه زى مثلا تشيليه أو تحضنيه ، قللي الحلويات والمواد المصنعة
كل طفل له طريقة خاصة به
3⃣-خلى فترات تدريبه او تعليمه قصيرة متجبرهوش انه يقعد لفترة طويلة وبين كل فترة وفترة راحة
5⃣- اخترعى له أنشطة حركية سواء لعب او للمذاكرة
” مثلا حطى الكتاب فى ناحية والكراسة فى ناحية ويجرى يقرأ من هنا ويكتب فى الكراسة وهكذا .. اخترعى طرق تفيد ابنكـ “
6⃣- اديه وجبات صحية خفيفة بين الوجبات ،، واديه وجبات صغيرة رئيسية
7⃣ اديله وقته في أي حاجة جديدة بيتعلمها واشرحهاله ووريهاله قبل ما يعملها
ولازم نفرق بين الطفل النشيط وطفل فرط الحركة لإن كتير بيتم الخلط بينهم
طفل فرط الحركة في الأصل عنده مشكلة ولازم له جلسات تنمية مهارات وتعديل سلوك لكن الطفل النشيط طفل طبيعي محتاج توجيه طاقته في شئ مفيد له
#اختلافهم_بيميزهم
#أمومة_واعية
#أكاديمية_ماما
مقالات قد تهمك ☺
طفل السنة اعلمه ايه ( التربية العفيفة )
طفل السنة اعلمه ايه ( المهارات الحركية )