الوليد ( الشهر الأول )

يوم ورا يوم بيكبروا ادام عينينا بنلاحظ تفاصيلهم الصغيرة ومع كل تغيير بنشوف فيهم إبداع الله في خلقه

وعظمة الخلق بتدل عل عظمة الخالق

ولما باجي اتكلم عن #التطور_الإدراكي بستشعر كل نعمة ربنا وهبها لنا ولأولادنا

الطفل مش بيدرك اللي حواليه إلا بحواسه ، كان جواكي جنين بيجي أكله لغاية عنده في جو هادي ضلمة فجأة طلع لجو جديد مليان أصوات وأضواء ومشاعر واحساس مختلف فاحنا بنساعده واحدة واحدة يتكيف مع البيئة اللي حواليه

وعشان نتكلم عن الإدراك هنتكلم عن الحواس في المرحلة دي

البصر

تعتبر أضعف حاسة عند الطفل

لسه الطفل مش بيشوف إلا على مسافة قريبة أوي وهي المسافة اللي بينك وبينه وقت الرضاعة

الصورة اللي بيشوفها الطفل مش بتبقى واضحة مفيهاش معالم ومبيشوفش التفاصيل

مبيقدرش يميز الألوان لكنه بيشوف الأبيض والأسود

مفيش تآزر وعشان نفهم أكثر يعني ايه تآزر هاتي قلم واكتبي به هتلاحظي إنك وقت ما بتكتبي بتبصي على اللي بتكتبيه شغلتي حاستين مع بعض

الطفل مبيقدرش يعمل التآزر ده في البداية

في نسبة حول بسيطة وبتروح كل ما يكبر

السمع

الحاسة دي بتبدأ من الشهر السادس في الحمل ، فاكرة لما كنتي بتتحسي بطنك وبتتكلمي معاه وتقوليله إنه وحشك ونفسك تشوفيه وتحضنيه

هو كان سامع صوتك وعارفه وبعد الولادة أول حد بيطمن معاه أنتي لما يسمع صوتك

صوت السورة اللي كنتي بتشغليها على طول هو عارفها ، صوت دقات قلبك وأصوات الرحم كل ده بيسمعه وبنعمله وسط زيه لما يتولد عشان يطمن ويهدى

الطفل في المرحلة دي بيبقى عارف صوت مامته وباباه اللي كان بيتكلم معاه في الحمل أكثر من أي حد

بينتبه للصوت العالي أو الصوت الفجائي وبيخليه يتخض منعكس مورو اللي كنا اتكلمنا عنه المرة اللي فاتت

مش بيفهم مدلول الكلام يعني هو سامع صوت لكن الصوت ده بيقول ايه عاوز ايه طبعا مش هيفهمه

الشم

أثبتت الدراسات إن الطفل بتبدأ حاسة الشم من الشهر السابع في الحمل سبحان الله

بعد الولادة بيشم الروائح القوية وكل ما يكبر هيبهرك بيصحوا وقت الغدا مخصوص

الطفل عارف ريحتك من وقت ما كان في الرحم وبيطمن جدا وهو في حضنك

بيشم ريحة اللبن

هتلاحظي إن في روائح مبيحبهاش لو غيرتي الشامبو أو الشاور أو حتى برفان وهيجي عليكي وقت تمنعي روائح كتير مزعجة له لأن ده بينفره من الرضاعة

التذوق

الحاسة دي بتبقى موجودة من وقت الحمل لأنه بيبلع السائل الأمينوسي وده سائل حلو وبعد الولادة لبنك طعمه حلو وبعد ما يكبر وتدخلي أكل هتلاحظي بيميل للحاجات الحلوة أكثر

ولو لبنك طعمه اتغير لأي سبب هتلاقي له رد فعل لده

اللمس

الحاسة دي بتبقى قوية وهتلاحظي نشاط الطفل لو الجو حر أو ساقع

جسمهم حساس لأي حاجة خشنة هتلاقي تيكيت الهدوم بيزعجهم وهتلاقي الخياطة الجانبية بتضايق بعض الأطفال فاقلبيها للناحية الناعمة

في كل حاسة من دول هنحط أنشطة بسيطة لتنشيطها وعشان تعرفي تطور نموه لكن هتلاقي إن الطفل مبيستجابش في الأول وممكن يقعد فترة على كده ،ده عادي وطبيعي ، كل طفل بيختلف عن التاني واستجاباتهم ردود أفعالهم سرعة أو بطء تطورهم مختلفة فنهدى ونطمن.

#النمو_اللغوي

أول نفس بياخده هو مرحلة من مراحل تطور اللغة ، اللغة ايه غير أصوات بتكون كلمات وجمل والأصوات ايه غير نفس متنظم ؟

طبعا الطفل مبيتكلمش لكن من أول مراحل التطور اللغوي # البكاء

هو وسيلته في التواصل مع اللي حواليه

تخيلي معايا لما تروحي بلد أجنبية متعرفيش أي لغة غير اللغة العربية وكل ما تتكلمي مع حد مش فاهم ،فتعملي اشارات وحركات لعل يوصل اللي عوزاه

ولو مفهموكيش بتحسي بغربة عدم أمان ولما تلاقي حد فهم إشارتك بتفرحي فرحة كبيرة وتطمني

بالضبط طفلك كده ميعرفش غير اللغة دي

بيقعد يعمل حركات إنه جعان أو تعبان أو عنده مغص وأنتي كمامي جديدة لسه بتحاولي تفهميه

مجرد ما بتلبي الاحتياج بتاعه بيهدى خالص ويطمن

#النمو_الإنفعالي

احساس كبير بالحب وهو في حضنك ،بالأمان وقت الرضاعة

أكثر حاجة بتساعد الطفل في النمو الإنفعالي وقت الرضاعة

والتلامس اللي بينك وبينه

حتى الأم اللي مبترضعش تعمل skin to skin جسمها يلامس جسمه بيطمنوا أوي

على عكس المتوقع الأطفال بتحس بالألم وتعبر عنه بصرخة ألم ، بيحسوا بكي جدا وبيحسوا بالحزن سبحان الله رغم عدم إدراكه الكافي لكنه بيحس أوي.

ايه الأنشطة اللي ممكن اعملها لطفلي ؟

بعد ما تكوني كويسة ووجع الجرح يخف وتحسي إنك مرتاحة اعمليه ، لو لقيتي نفسك مش قادرة أجلي كل حاجة لغاية لما تتأقلمي ولو كان شهر أو شهرين عادي جدا المهم تكوني مرتاحة

من أواخر الحمل ممكن تجهزي كروت الأبيض والأسود أو تطبعيهم وتعلقي كارتين عند سريره قريب منه عشان ينشط حاسة البصر وهحط صور في التعليقات وممكن تطبعيهم وتلزقيهم على ورق مقوى عشان يبقوا جامدين وممكن تعمليهم في دفتر صغير وتعرضيهم على طفلك كل يوم بس يفضل تعلقيهم

طفلك في البداية ممكن ميشوفهمش أصلا متقلقيش وطبيعي مادام عاملين كشف نظر ومطمنين ، هو لسه جديد معانا زي ما وضحت

الهدف :- النشاط ده بينمي الانتباه والتركيز عند الطفل خلونا الفرق الأول بين الانتباه والتركيز

لو حد نداكي أول حاجة هتعمليها تبصيله ده انتباه لو اتكلم وفضلتي بصاله ده تركيز ،فالانتباه مدته صغيرة ولحظي لطن التركيز مدته أطول

فالطفل بمجرد ما ينتبه له ويبص له شوية ده كده تركيز.

اتكلمي معاه في كل وقت ، يلا بينا وقت الرضاعة ، اوووه عملت عمام يلا نغير ، يلا نستحمى ، هنعمل دلوقتي كذا ،اتكلمي على قد ما تقدري

الهدف :- التواصل طبعا ، تنشيط حاسة السمع ، تخزين حصيلة لغوية لغاية لما يبدأ يتكلم

شغلي قرآن في الأوضة اللي هو فيها ولو في سورة معينة كان بيسمعها في الحمل شغليها له

الهدف :- تنمية التركيز السمعي

اقفي ادامه واتكلمي وبعدين اتحركي واتكلمي وبعدها اتحركي الجهة الثانية واتكلمي

الهدف :- تنمية التركيز البصري

ممكن تشمميه أكلات تفاح مثلا موز مجرد شم بس

جربي تستخدمي نفس الشاور بتاعه عشان ريحته تكون مألوفة

ابعدي عن الروائح المزعجة اللي مش بيحبها

الهدف :- تنشيط حاسة الشم

طبعا متدوقهوش أي حاجة خالص ، حاسة التذوق بتنشط بالرضاعة ثم ادخال الأكل فيما بعد

وأنتي بتغطيه بعيدا إنه هيرفص الغطا كله بس تعمدي تسيبي حتة من رجله مكشوفة فترة صغيرة خالص وبعدها غطيه

الهدف :-. يعرف الفرق بين الحر والسقعة

اعملي skin to skin كتير

Tummy time.

وقت لطيف بتحطي طفلك على بطنه ادااااام عينك ، في الأول مش بيحبوه وبعد كده بيبدأوا يتعودوا عليه ، حطيه ثواني في الأول وبعد كده زودي دقيقة وبعدها دقيقتين اعمليه مرتين في اليوم كفاية أوي

الهدف :- تنمية المهارات الحركية الكبرى ( حركة الايد ) و تقوية عضلات الرقبة والكتف والذراع

الألعاب المعلقة من الألعاب الممتازة لتنمية الانتباه والتركيز البصري

ممكن تحطوها فوق سريره بس تتشال وقت النوم

ممكن في باونسر

ممكن تعملوها في علاقة هدوم وتلاعبوه بها هبقى اصورهالكم

الضوضاء البيضاء لطيفة وبتنفع مع بعض الأطفال هي عبارة عن أصوات مشابهة للأصوات اللي كان بيسمعها في الرحم فبيطمن ويهدى وينام هتلاقوا فيديوهات لها هي عبارة عن صوت مكنسة ماء استشوار حاجات من النوع ده

خليه دائما يسمع صوت قلبك ده بيطمنه ويهديه جدا جدا وبعض الأطفال بيناموا لما يسمعوا صوت دقات القلب واللي شبيهة لها شوية صوت الساعة

اعملي مساج للبيبي ووقت الرضاعة امسحي بإيدك على شعره ووقت النوم طبطبي عى ظهره أو بطنه

قوليلنا ايه النشاط المحبب لابنك ؟ واقترحوا أنشطة تخدم أهداف تطوره في المرحلة دي وأنا هعلق عليها ونعدلها سوا

#الوليد