حلول تربوية – أسلوب الاختيار

#أسلوب_الاختيار
يعنى ايه؟
يعنى بحط اختيارين ” شيفاهم مناسبين وموافقة عليهم ” وبسيب حرية الاختيار للطفل
زى مثلا تحب تشرب عصير مانجو ولا فراولة
وهو له حرية الاختيار الكاملة

ايه الهدف من أسلوب الاختيار؟
الهدف هو إنه يبقى له حرية الاختيار، الطفل بيحب يحس إن له شخصية مستقلة له اختياره فالأوامر الجافة بتخليه يعند أكثر عشان كده الأسلوب ده فعال أكثر مع الأطفال ومهم نعرف إنه مينفعش اوجهه لاختيار أنا عوزاه أكثر ولو بتعبيرات الوش والايماءات اللى بتظهر لما بيختار شئ كنوع من الاجبار الغير مباشر على اختيار أنا عوزاه
زى انى بخيره بين طقمين وأنا عاوزة يلبس واحد منهم فلما يختار التانى ابين انى متضايقة أو محبطة انه اختار ده فيرجع يختار الاول عشانى مش عشان هو اختار

وزى ما اتعودنا تعالوا ناخد رحلة فى سيرة الرسول ونشوف ازاى استخدم الأسلوب ده
أن رسولَ اللهِ صلى الله عليه وسلم أُتِيَ بشرابٍ فشَرِبَ منه ، وعن يمينِه غلامٌ ، وعن يسارِه الأشياخُ ، فقال للغلامِ: أَتَأْذَنُ لي أن أُعْطِيَ هؤلاءِ ؟ فقال الغلامُ : واللهِ، يا رسولَ اللهِ ، لا أُوثِرُ بنصيبي منك أحدًا . قال : فتَلَه رسولُ الله صلى الله عليه وسلم في يدِه .

كل ما كنت بقرأ الحديث ده بقف عنده كتير على كمية الحاجات اللى بيتعلمها الطفل فى موقف بسيط زى ده
الرسول صلى الله عليه وسلم استأذنه وخيره بإنه يعطى الشراب للشيخ الأول واغلام له حرية الاختيار فى القبول أو الرفض لإن ده حقه
ولما رفض الرسول منهرهوش ولا قاله احترم الكبير ولا أى حاجة تنقد فعل الطفل بل احترم رغبة الغلام ووضع الشراب فى يده

#المهارات اللى بيتعلمها هنا
إنه يكون له شخصية مستقلة ويختار بنفسه “بيشبع عند الطفل احتياج الاستقلال”
الغلام هنا اتعلم احترام حق كل انسان مهما كان سنه
اتعلم مهارة من مهارات التواصل لو اللى ادامى رفض التنازل أو فعل شئ بطلبه منه ازاى اتعامل معاه برقى
علمه أدب الاستئذان
علمه احترام الرأى

فى شوية مبادئ كده مهمة عشان تنفذى أسلوب الاختيار صح؟

١- ابعدى عن الاختيارات الوهمية اللى هو اختيار أنتى عوزاه واختيار سئ جدا فميبقاش عنده حرية الاختيار اصلا ويبقى مجبر على اختيار الجيد
يعنى اقوله هتلم هدومك من الأرض ولا اضربك ده مش اختيار ده تهديد

٢- حطى اختيارين مناسبين لكى وموافقة عليهم، متحطيش من ضمن الاختيارات حاجة رفضاها فلو اختارها ترفضيها، امال بنخيره ليه؟

٣- فى أطفال عسل هتلاقيهم مش هيختاروا من اللى انتى قولتيه وهيقولك ” لا ده ولا ده”
هنا عندك كذا طريقة للتعامل
أول طريقة تقوليله بهدوء هل عندك اختيار ثالث افضل؟ وتتناقشوا مع بعض فيه
الطريقة الثانية هى إنك بهدوء برده بتكررى الاختيارات تانى ولو رفض بتقوليله تحب تختار ولا اختار لك؟ ولو زاد فى الرفض بتقوليله أنا مضطرة اختار نيابة عنك

الطريقة الثالثة وهى تقبل المشاعر أولا لما تلاقى منه رفض
زى البنت اللى الأم بتخيرها بين إنها تنام دلوقتى ولاكمان 5 دقائق والبنت رافضة
الأم لو ابدت فى الأول تقبل لمشاعرها أنا حاسة بكى وعارفة إنك مبسوطة وانتى بتتفرجى على التليفزيون أنا كمان بحس بده بس عندنا بكرة مدرسة بدرى تحبى تنامى دلوقتى ولا كمان 5 دقائق بتكون أكثر فى القبول من أسلوب الأمر أو الزعيق أو النصائح والتوجيهات الطويلة فى أهمية الصحيان بدرى

٤- فى نوعية أطفال ثانية عكس النوع اللى فات وهما الاطفال اللى معندهمش ثقة فى نفسهم فلو خيرتيهم يقولولك اختارى انتى، مش عارف اختار، أى حاجة
الطفل ده محتاجين نعلمه الاختيار
ممكن تبدأى تساعديه بإنك تعرضى عليه 3 مميزات للحاجة دى مثلا بص اللعبة دى امكانياتها كذا أو بتستخدم لكذا واللعبة دى امكانياتها كذا وتسبيه يفكر ويختار
اللعبة دى ممكن تكون مناسبة لك عشان كذا ، أنا بثق فيك وفى ذوقك وعارفة إنك هتختار الأنسب
بص دول مش لايقين على بعض أوى اللون ده بيليق مع كذا وكذا تحب تختار انهه وايان كان اختياره اقبليه

٥- مهم جدا معلقش على اختياره بالنقد أو السخرية

٦-مهم يكون الاختيارين مناسبين لعمر وقدرات الطفل

الأسلوب ده مناسب أكثر لمرحلة الطفولة يعنى لسن 8 سنوات

شاركينا بمواقف مرت عليكى مع ابنك وكان ايه رد فعلك وطبقتى ازاى أسلوب الاختيار معاه