حلول تربوية – أسلوب الطاعة الموجهة

النهاردة مع أسلوب جديد وهو #الطاعة_الموجهة

يعني ايه ؟
يعني بطلب من الطفل طلب لو منفذهوش برشده بدنيا عشان ينفذ الطلب ده

وليكن مثلا طفل بعد ما خلص لعب بالمكعبات وسابها على الأرض وقام
الواقع اللي بيحصل إن الأم هي اللي بتيجي تلم المكعبات وتحطها في مكانها ويتكرر نفس السلوك لإن الطفل متعودش ينظف مكانه وراه ويشيل الحاجة مكانها

الصح هو إن الطفل يتعلم يحط كل حاجة مكانها

ده هنعمله ازاي بأسلوب الطاعة الموجهة ؟
الأم بتطلب بكل هدوء من الطفل يحط المكعبات في صندوق اللعب ، وتستنى شوية لو منفذش الأمر بتكرره لو منفذهوش بتوجهه بجسمه عشان ينفذ الأمر يعني بتمسك ايده براحة ويلا نلم مع بعض وبتلم معاه واحدة واحدة وبعدين تشكره

الأسلوب ده مناسب لسن كام ؟
من ٢ل٦ سنوات

هل ينفع الطفل اللي لسه مش مدرك ؟
ينفع وبمسك ايده وبنلم مع بعض مرة على مرة وبعد كده هو بيعمل ده لوحده

هل ممكن استخدم أساليب تانية قبل الطاعة الموجهة ؟
اه ، بستخدم نظام المسابقات
يلا نشوف مين فينا هيسابق التاني ويلم أسرع وبعمل مسابقة أنا وابني

بستخدم نظام التخيل
المكعبات دي تعبت أوي النهاردة من اللعب وعاوزة تروح بيتها ” صندوق اللعب ” تفتكر ازاي ممكن نساعدها تروح بيتها
أو اخترعي أي حاجة تخيلية واستمتعوا ، الأوامر بتستفز العند عند الطفل

ايه خطوات الأسلوب ده؟
بدي أمر بسيط أنا عارفة الطفل هيعرف يعمله
لو نفذه بشكره
لو منفذهوش بقوله تاني وباخد بالي من نبرة صوتي وتعبيرات وشي
لو منفذهوش بوجهه بجسمه عشان ينفذه برفق
لما بينفذ حتى لو في البداية بمساعدتي بشكره

شوية ملاحظات :
⁦⁩ مينفعش بأي حال من الأحوال نتحايل على الأطفال ، أو نطلب بضعف .. الهيبة أساس التربية

⁦⁩⁦مينفعش اكلفه بأكثر من قدرته لازم يكون الأمر مناسب لسنه وقدرته

⁦⁩ الحزم مش العصبية يعني نبرة قوية واثقة في فرق بينهم وده محتاج تدريب كتير

⁦⁩ مينفعش تقومي أنتي تنفذي الأمر كده الطفل متعلمش حاجة

⁦⁩ بعلم الطفل الأول ازاي يعمل الأمر،مبطلبش منه حاجة مبيعرفش يعملها !

⁦⁩بختار الوقت المناسب
يعني لو هو بيلعب ولا بيتفرج على التليفزيون وطلبت منه طلب مش هيعبرني أصلا
لكن بعد ما يخلص لعب بطلب يشيل المكعبات

في كل الحالات الأسلوب ده فعال جدا لصغار السن وبيعلمهم ازاي يحطوا الحاجة في مكانها بعد ما يخلصوا ، بيعلمهم النظام والإستقلالية