حلول تربوية – التجاهل

والنهاردة ميعادنا مع أسلوب جديد في سلسلة #حلول_تربوية وهو أسلوب التجاهل أو الإطفاء ورغم إنه يبان أسلوب سهل إلا إنه لو اتعمل غلط مش هيجيب نتيجة وله تكنيك معين

بستخدمه ليه ؟
عشان اقلل السلوك اللي مش عوزاه في طفلي

بينفع مع أكثر مشاكل العند من الطفل
لو طفل كان عاوز حاجة ورفضت وبدأ يعيط الأسلوب ده بالتكنيك الصح فعال
لو طفل بيشد فيشة التليفون أو بيعمل دوشة وأنا بتكلم في التليفون و بيعمل جذب انتباه بس بشرط العلاقة بينا تكون صحية في الأساس
لو طفل بيعمل سلوكيات بتضايقني جذب انتباه أو انتقام “وده نادر شوية ”
مشكلة الزن

يعني ايه تجاهل ؟
يعني بعمل نفسي مش واخدة بالي من السلوك المزعج اللي حصل بهدف إني اقلله


تعالوا ناخد مثال صغير
طفل عاوز شوكولاتة والأم رافضة تديله لإنها مش صحية له أو له مقدار معين فالطفل مصمم ومع رفض الأم بدأ يعيط
السلوك اللي عاوزة اتجاهله هنا هو العياط مش طلب الطفل

طيب لو فرضنا إن الأم صدعت من عياط الطفل فقررت تدي للطفل بعد رفضها .. كده هنا الطفل اتعلم إن العياط = اخد اللي أنا عاوزه
ففكل مرة لما يعوز حاجة هيعمل ايه ؟! بالضبط هيعيط ويزن

طيب هل لو الأم تجاهلت السلوك الطفل هيسكت ؟
لأ مفاجأة مش كده
الطفل مبيستسلمش زينا بسهولة بيحاول بكل الطرق يوصل للي عاوزه
فجرب العياط ومنفعش مع ماما يسكت ؟أبدا
يقوم يعلى الصوت شوية ويراقب ماما كده أخبارها ايه زهقت ولا لسه ؟ منفعش يقوم مصرخ شويتين يعيط بال ٤ ساعات لغاية لما يرجع ويصعب على ماما ويشوف ها نفع ولا لسه ؟
منفعش يخبط دماغه في الحيطة ، يرمي نفسه على الأرض المهم يشوف آخر ماما ايه

لو ضعفتي في أي مرحلة فيهم اعرفي إنك ادتيله الأسلوب اللي يتعامل به كل مرة
عشان كده لما تقرري تستخدمي الأسلوب ده لازم تمشي بالتكنيك بتاعه عشان تلاقي نتيجة ولازم الطفل ميعرفش اخرك “ده لمصلحته هو عشان تعرفي تربيه “

هل التجاهل هو الهجر ؟
لا المربي مبيهجرش أطفاله أبدا
التجاهل بتجاهل سلوك مش الطفل وبمجرد ما السلوك يقل بتعامل كإن شيئا لم يكن

ايه هو تكنيك أسلوب التجاهل ؟
⁦⁩بشوف الأول سبب سلوك الطفل لإن جايز جدا الطفل بيعمل كده جذب انتباه لإهمال الأم أو انشغالها عنه فساعتها هنحتاج توفير وقت له وده كافي لتقليل السلوك واختفاؤه فلازم احدد سبب المشكلة بدقة

⁦⁩بتجاهل السلوك مش الطفل ودي نقطة مهمة
اه بدور وشي كإني مش شايفة عياطه أو اللي بيعمله عشان يشوف أخري لكن بمجرد ما يوقف بتعامل كإن شيئا لم يكن

⁦⁩ على وشي ميبانش أي تعابير خالص ،لو بان إني متضايقة ده ممكن يكون مؤشر إن الطفل يزود السلوك

⁦⁩ بتأكد إن مفيش معزز تاني ، يعني لو رفضت اديله البسكويت وتجاهلت سلوكه مش اتفاجأ إن جدته بتديهوله كده أنا معملتش حاجة بالعكس ده اتعلم طريق تاني ياخد به حاجته وهو جدته
وده نفس نظام الأطفال اللي بتعمل سلوكيات مزعجة برة البيت لما يكونوا عاوزين حاجة عشان عارفين الأم مش هتعمل حاجة

⁦⁩ في البداية السلوك هيزيد ولدرجة مزعجة للأم زي ما شرحت وممكن تزيد الفترة أو المدة لكن لو مشينا صح هيبدأ يقل بالتدريج ،أي رد فعل مني هيرجعنا لنقطة الصفر من تاني

⁦⁩ في بعض المواقف بستخدم أساليب تانية زي قبول المشاعر يعني لو طفل عاوز حاجة بيحبها ورفضت ممكن اقبل مشاعر حزنه واعرفه إنه عنده حق ولو طفل كبير شوية ممكن اسأله ايه ممكن يقلل حزنه وأحيانا الأسلوب ده بيكون كافي جدا للطفل
ولو الطفل صغير غير مدرك ممكن استخدم أسلوب الالهاء وده فعال جدا مع صغار السن

المهم لو قررتي تستخدمي الأسلوب ده لازم تمشي على الخطوات عشان يجيب نتيجة معاكِ ومتنسيش الإستعانة بالله