حلول تربية – الأسلوب الصامت

النهاردة أسلوب جديد وهو #الأسلوب_الصامت

ده أسلوب لطيف جدا الأم بتتدخل فيه من غير كلام نهائي

بستخدمه ليه ؟
عشان احل الموقف وكل ده في صمت

ايه الحالات اللي ممكن استخدم فيها الأسلوب ده ؟
كتير منها
طفل كسر حاجة وهو بيلعب بالكرة والأم نبهته كذا مرة إنه ميلعبش هنا بتسحب الكرة في صمت
أخين بيتخانقوا على لعبة وسبتهم يتعاملوا ويحلوا مشكلتهم والموضوع وصل لتطاول وضرب بتسحب اللعبة
طفل بيتفرج على حاجة مش لطيفة وكنا نبهنا على ده قبل كده فامسك الريموت واقلب القناة
طفل استخدم حاجتي الشخصية بدون استئذان بسحبها بدون كلام واشيلها
فتح كمبيوتر ، فتح موبايل بدون استئذان بسحب الموبايل من غير كلام ،بقفل الكمبيوتر
طفل مش بيغض بصره ،من غير كلام بدور وشه

ده حل سريع وفعال في بعض الحالات اللي بكون نبهت فيها ووجهت وعرفت الطفل وبيكون من غير كلام

وفي السيرة النبوية هنلاقي إن ده علاج نبوي رائع
عنِ ابنِ مسعودٍ، أنَّهُ كانَ يصلِّي فوَضعَ يدَهُ اليُسرى على اليُمنى، فرآهُ النَّبيُّ صلَّى اللَّهُ عليهِ وسلَّمَ فوضعَ يدَهُ اليُمنَى على اليُسرَى

عن عبد الله بن عباس، رضي الله عنهم، قال: “أردف رسول الله، صلى الله عليه وسلم، الفضل بن عباس، رضي الله عنهم، يوم النحر خلفه على عَجُزِ راحلته، وكان الفضل رجلاً وضيئاً، فوقف النبي، صلى الله عليه وسلم، للناس يُفتيهم، وأقبلت امرأة من خثعم (وضيئة) تستفتي رسول الله، صلى الله عليه وسلم، فطفق الفضل ينظر إليها وأعجبه حسنه، فالتفت النبي، صلى الله عليه وسلم، والفضل ينظر إليه، فأخلف بيده فأخذ بذقن الفضل، فعدل وجهه عن النظر إليها، فقالت: يا رسول الله، إن فريضة الله في الحج على عباده أدركت أبي شيخاً كبيراً لا يستطيع أن يستوي على الراحلة، فهل يقضي عنه أن أحج عنه؟ قال: نعم) رواه البخاري ومسلم

ازاي بستخدمه ؟

⁦⁩لازم اكون نبهت الطفل على غلطه ولو مرة

⁦⁩لازم أكون متأكدة إن الطفل فاهم اللي عمله غلط

⁦⁩ في حالة الخناق مع أخوه بسيب الطفل يحل مشكلته وبوجههم إنهم يلاقوا حل يرضيهم قبل ما اتدخل

⁦⁩الأسلوب يكون برفق وبهدوء وفي صمت ،هدفي افهمه غلطه من غير كلام مش اعاقبه

⁦⁩ لازم تكون العلاقة صحية بين الأم والطفل

رغم إن بعض الأمهات بتبقى شايفة أن الأسلوب ده مش هينفع مع الأطفال الشقية والمتمردة إلا أنه أسلوب فعال جدا