طفلي من الميلاد لسنة

بروك بقيتي مامي

أحلى كلمة بنسمعها ويوم ورا يوم بيكبر جوانا في انتظار لحظة حضنه

ويجي اليوم المنتظر ويجي معاه اللخبطة والتوهة والتعب والفرحة

اعمل ايه معاه ؟ اعرف منين إن تطوره طبيعي ؟ ايه الأنشطة اللي انمي بها مهاراته ؟ هو ليه بيعيط وليه بيزن وليه بيجي عليه وقت ممكن مينامش طول اليوم ويطبق باليومين ؟ ايه أهداف كل مرحلة وازاي اشتغل عليها

وأسئلة كتير بتسألها كل أم عشان تطلع أحسن ما يكون من طفلها

تعالوا نبدأ بمرحلة بسيطة النهاردة وهي أول أسبوعين هنسمي المرحلة دي بمرحلة #الوليد

المرحلة دي جميلة أوي وصعبة أوي بس لازم تعرفي إنها هتعدي وكل ده هيبقى ذكريات جميلة محفورة في سجل رحلتك مع أولادك مش مطلوب تعملي أحسن حاجة مطلوب تكوني مرتاحة عشان تقدري تكملي مش مطلوب منك كأم غير كام حاجة بسيطة

لكي

تهتمي كويس جدا بصحتك الجسدية ومتجهديش نفسك وترتاحي بقدر الإمكان

تهتمي بصحتك النفسية وتطلبي مساعدة ودعم لو جالك اكتئاب ما بعد الولادة

للبيبي

ترضعيه كل ساعتين حسب الطلب

تهتمي برعايته ( نظافته – الغيار – الاستحمام – متابعة تطوره عند الطبيب )

متابعة تطوره في جوانب النمو ومعرفة خصائص نموه

هنتكلم بطريقة مبسطة عن جوانب النمو في المرحلة دي #الوليد

#النمو_الجسمي

رغم إن الجانب ده بنتابعه مع الدكتور لكن حابة اذكر فيه حاجات أساسية مختصرة أمهات كتير كانت بتسأل فيها وده عشان نبقى واعيين لها

الطفل بيبقى لونه محمر شوية ده عادي وطبيعي ومفيش منه مشكلة ومتقلقيش هيتغير بعد كده وهيفضل يتغير لونه ومع الوقت هيظهر لون بشرته الحقيقي فهو مش شبه حد دلوقتي

الجلد بيبقى عليه مادة دهنية دي بتحمي البيبي وبعد كام ساعة تروح لوحدها ومتخصصات الرضاعة بيوصوا إن البيبي ميستحماش بعد الولادة عشان تفضل المادة دي تحميه وتحافظ عليه سبحان الله

جسمه هتلاقيه في شعر كتير ، متقلقيش هو مش مشعر ولا حاجة ، كل ده هيروح مع الوقت

الوزن الطبيعي ٢٥٠٠ ولو نقص شوية ومحتاجش حضانة فابنك كويس ومفيش مشكلة مادام متابعة مع الدكتور وبيطمنك والطفل وزنه هيقل أول أسبوع وبعد كده هيزيد ويبقى زي الفل أقل زيادة طبيعية ١٥٠ جم في الأسبوع أول ٣ شهور

عشان نتفادى الرأس المسطحة بنيم الطفل على الجانب اليمين والشمال والظهر بالتساوي يعني ساعة وساعة وساعة مثلا ودلوقتي في مخدات طبية مخصصة للأمر بتبقى حوالين رأس الطفل ده لكني مبفضلهاش عشان الطفل يحرك رأسه براحته

وبديلها لو الطفل مش عارفة تنيميه على جنبه حطي مخدة وراه ومخدة ادامه تحت راسه عشان نفسه وخلي بالك يكون ادامك عشان النوم على البطن ممكن يخليه ميعرفش ياخد نفسه ويتكتم #متلازمة الموت المفاجئ

العظم بيكون لين عشان كده لازم نسند الظهر والرأس كويس جدا ولو هتستخدمي شيالة يكون فيها انسيرت مدعم للظهر ومدعم للرقبة لأنه لسه مش بيعرف يصلب رقبته وطبعا الشيالة تكون صحية ويكون قاعد فيها على شكل M

#النمو_الحركي

الطفل هنا لسه بينام على ظهره مش بيتحرك كتير وحركته عشوائية لا إرادية وهنا بيتلخص تطوره في حاجة اسمها #المنعكسات

يعني ايه ؟ يعني حاجة بيعملها الطفل بشكل لا إرادي تماما ردود فعل لا إرادية

والمنعكسات دي مهمة لأنها بتدل على صحة الجهاز العصبي للطفل

هنتكلم عن أهمهم مش في المرحلة دي بس عشان نبقى مجمعينهم في بوست واحد

منعكس #المص (الميلاد ل ٣ شهور )

ايوه سبحان الله بمجرد ما تحطي البيبي على الثدي هتلاقيه بيمص لو حطيتي صبعك أو لمستي الشفة اللي فوق أو اللي تحت هتلاقيه بيمصه هو شئ لا إرادي تماما ربنا زوده به عشان يقدر يأكل ويتغذى

المنعكس ده ممكن يقعد ل ٣ شهور وبعد كده بيكون المص بشكل إرادي من الطفل

منعكس #مورو هحطلكم صورته ( الميلاد ل ٣ شهور )

في بداية أيامي كمامي جديدة ولما بنتي عملته فضلت مخضوضة طول اليوم وطبعا نسيت مورو واللي اخترعه

المنعكس ده بيبان جدا لما يكون في صوت عالي أو نور قوي أو لو سحبتي ايده فجأة وسبتيها هتلاقيه فجأة كده رفع ايده فوق كإنه مخضوض وبعدها بيقفل ايده وينزلهم تاني

ممكن يقعد ل ٣ شهور وبعدها المنعكس بيختفي

منعكس #القبض (الميلاد ل ٤ شهور )

عارفة لما تيجي تحطي صبعك في ايده يقوم ماسك ايدك

الحركة اللي بتدوب قلوبنا دي

هو ده منعكس القبض

ممكن يستمر معاه ل ٤ شهور

لو معندهوش المنعكس ده يبقى لازم يتعرض على دكتور

وبعد كده المنعكس ده هيتحول لفعل إرادي منه

منعكس #البحث ل ٣ شهور

سبحان الله ربنا زوده بالمنعكس ده إنه يحرك رأسه يمين وشمال بيدور على الأكل ولو شيلتيه هتلاقيه دور رأسه ناحيتك علامة منه إنه جعان ولو لمستي شفته أو قربتي صبعك هتلاقيه بيدور رأسه ناحيته

منعكس #المشي

أول مرة الدكتور جرب ده مع بنتي مكنتش فاهمة بيعمل ايه مسكها من تحت باطها وقفها على رجليها كإنها بتمشي هما بيحددوا به مدى صحة الجهاز العصبي لكن طبعا الجهاز العصبي مبيكنش لسه ناضج بشكل كافي

منعكس #تماثل_الرقبة

وهنا بيبقى واخد شكل المبارز شوية

هتلاقيه لو دور رقبته في اتجاه فأطرافه بتاخد نفس الاتجاه

لو المنعكس ده استمر أكثر من ٦ شهور يبقى عندنا خلل في مراكز المخ

منعكس #بابنسكي ل ٤ شهور

لو لمستي بطن رجليه رأسي وأفقي هتلاقيه رفع صبعه الكبير

لو المنعكس ده استمر بعد السادس هيدل على ضعف في الجهاز الحركي

منعكس #بابكن ل ٣ شهور

لو مسكتي بإيدك على ايد الطفل تلاقيه غمض عينه وفتح بقه

المنعكسات دي مهمة جدا جدا جدا ولازم نبقى عارفينها ونتابعها كويس لأنها تدلنا على صحة الطفل وأي منعكس اتأخر عن ظهوره أو استمر عن ميعاده لازم منتجاهلش الموضوع ده