طفل السنة اعلمه ايه ( التربية الإجتماعية )

من سنة لسنتين .. يعرف ايه واعلمه ايه ؟؟

النمو الإجتماعي للطفل بيتأثر بالجو الأسري فكل ما كانت الأسرة مستقرة والعلاقة بين الأم والأب طيبة كل ما ساعد الطفل على نمو إجتماعي وعاطفي أفضل

السن ده سن التقليد ، الطفل بيقلد اللي حواليه سواء كبار أو صغار فتلاقيه بدأ يقلد حركاتك تعبيراتك اللي بتعمليه

ولما يتجمع بأطفال تلاقيه بيراقب هما بيعملوا ايه ويعمل زيهم والتقليد هنا مهم جدا لتنمية مهاراته المهم البيئة والأشخاص اللي بيقلدهم

مهم بعد ما يتعرف على أفراد الأسرة والعائلة ( زي ما هنقول في المهارات اللغوية ) إنه يزورهم ( صلة الرحم ) مش هيفهم في السن ده لكن الزيارات والاختلاط بالناس المألوفين له هيخليه يتعود عليهم

لما يكبر نبقى نعرفه يعني ايه صلة رحم

عوديه على مجالس القرآن والذكر لو أنتي بتروحي تحفظي قرأن مثلا

طبعا السن ده صعب التحكم فيه فلازم ميكنش الوقت كتير لأنهم مش هيبطىوا اكتشاف

جميل إنه يشهد صلاة العيد وتجمع المسلمين

عوديه يسمعك بتدعي لغيرك وللمسلمين

السن ده بيتميز باللعب # الفردي و#الموازي

يعني ايه ؟ يعني هو مبيعرفش يلعب مع أطفال مبيعرفش يشارك في السن ده

لكن هو بيعرف يلعب لوحده #اللعب_الفردي وبيعرف يلعب جنبهم بس كل واحد معاه لعبته #اللعب_الموازي واحنا بس بنحاول نفهمه معنى ( نلعب مع بعض ) لكن مش شرط ده يتفهم بالعكس هتلاقي كتير بتحصل خناقات لأن هو متمحور حول ذاته بالنسبة له اللعبة بتاعته مينفعش حد يلعب بها أو يلعب معاه فتلاقيه يشد اللعبة وتبدأ الخناقة

طبعا ادي كل واحد لعبته ويلعبوا جنب بعض

بيقدر يفهم تعبيرات الوش إذا كان حد زعلان أو متعصب وممكن يتعاطف مع مامته بطريقته الخاصة

بيخاف من الغرباء ويستخبى في مامته أو باباه لأنهم الأمان له ، لكن يقدر ياخد خطوة ويتعامل لو لقى إشارة أمان من الوالدين بالتعامل

بيتأرجح بين التعلق والاستقلال

يعني هو متعلق جدا بمامته أو باباه وبيقلق من الانفصال عنهم وهتلاقي وقتها نوبات غضب وعياط وصريخ لو بعدتي أو مشيتي

لكن في نفس الوقت هو عاوز يستقل بنفسه فتلاقيه بيسيبك ويكتشف المكان حواليه لكن أنتي تكوني ادام عينه وحاسس بوجودك عشان يبقى مطمن ويرجع لكي وقت ما يحب

بيخافوا من حاجات غريبة ويمكن مش منطقية لنا

يعني ممكن تلاقيه مش عاوز يتعامل مع شخص لأسباب مش مفهومة زي إنه عنده شنب ودقن مثلا ده بالنسبة له حاجة مخيفة

أو إنه مكشر أو شافه زعق مرة واحدة مع حد تاني فبدأ يتجنبه أو شعره شكله مختلف

المهم في سبب مش مفهوم ممكن متعرفيش توصلي له

لو عمل حاجة واللي حواليه ضحكوا هيكررها كتير

وهنا مهم إننا منضحكش على الحاجات الغلط زي إنه تف على عمو يا حبيبي

عشان مش هيبطل تف

هو فهم كده إن دي حاجة بتضحك ولطيفة فليه منكررهاش ونضحكهم ؟؟

خلقنا لنعترض

ده شعار مرحلتنا ومكمل معانا ، أول ما بيتكلموا بيقولوا لا على طول ما شاء الله طيب في نعم ، في حاضر طيب لا هي لا يعني لأ

بداية نوبات الغضب بتكون في السن ده ، هو مش عارف يعبر بالكلام فبيعبر عن غضبه واحباطه واعتراضه بالطريقة دي

وكل طفل وله طريقة تعبيره بقى وربنا معانا كلنا إن شاء الله

عوديه على الاختلاط بالغير ، الاختلاط بأطفال زيه أو أكبر منه بينمي مهاراته الإجتماعية وباقي المهارات ، المهم نختار البيئة اللي يختلط بها لأنه مش هيميز الصح من الغلط دلوقتي

تعويد الطفل سماع سُنة السلام