طفل السنة اعلمه ايه ( التربية العقلية )

من سنة لسنتين … يعرف ايه واعلمه ايه ؟

نغرس حب القراءة بقراءة القصص المناسبة لسنه ومن سنة ونص ممكن نوفر له كتب قماش أو هاردكاڤر ومكتبة صغيرة على قد حجمه ( لو كان بطل يحط الحاجة في بقه )

في السن ده بيبدأ ينتبه لأصوات الأشخاص اللي حواليه ، أصوات في المطبخ زي الخلاط ومضرب البيض ، صوت التليفزيون أو الموبايل أو الآذان أو صوت القرآن الكريم أو لما حد ينادي عليه

بيحب الألعاب اللي فيها تتبع بصري زي ضوء الكشاف وتحركيه ، الليزر ، العربيات اللي فيها أنوار وبتتحرك

يقدر يميز يعني يعرف الطماطم من الخيار مثلا يعرف يميز بين حاجتين إنهم مختلفين

علميه في السن ده الفرز يطلع حاجة من حاجات مختلفة

يطلع مثلا خيار من طبق فيه خضار مشكل

وعلميه المطابقة ( يحط الحاجة على اللي زيها )

مطابقة مجسمات حقيقة ( طماطم حقيقية يحطها على اللي زيها ، شوكة على اللي زيها ،…)

مطابقة مجسمات بصور ( صورتين ومجسمات لهم وحط دي على اللي زيها )

في السن ده كمان بيقدر يطابق ألوان ببعض حتى وهو مش عارف الألوان

من اللعب اللي ممكن توفريها في السن ده هو البازل القطعة الواحدة وعمود الحلقات والمكعبات لأنها بتعلمه التفكير

علميه حل المشكلات بإنك تسبيه يتصرف في بيئة آمنة

يعني لو هو بيلعب بلعبة ومش عارف يعملها خليه يحاول فيها ويفكر ازاي ممكن يعملها ولو معرفش بعرض عليه المساعدة واوريه ازاي يعملها وامسك ايده ونعملها سوا بس في الأول لازم بعد ما اوريه الطريقة اسيبه يجرب

وهو عنده القدرة على حل المشكلات يعني مش عارف يأكل بالمعلقة هياكل بإيده

يحاول يشيل حاجة وطلعت تقيلة هتلاقيه بيجرها وهكذا

المطلوب مننا إننا مادام الحاجة آمنة له منتدخلش ونشوفه هيعمل ايه ويتصرف ازاي

وآخر خطوة لما يبدأ يزهق ويحبط وقتها نتدخل للمساعدة

لكن لو اتدخلتي في الأول وعملتي الحاجة بالنيابة عنه كده أنتي مدتهوش فرصة يفكر ويحل مشكلته بنفسه ويعتمد على نفسه وده بالتكرار هيخليه ميثقش في نفسه وميحاولش ويعتمد عليكي

اعرفي بس امتى تتدخلي وامتى تسبيه يتصرف لوحده

بيحبوا اللعب التخيلي

ممكن تلاقيه ماسك التليفون وعمال يتكلم بلغته الخاصة

ممكن تلاقيها ماسكة العروسة بتاعتها وبتشربها اللبن

ممكن تلاقيه خايف من حاجات بالنسبة لك متخوفش لو ارتبط في دماغه بتجربة سيئة

زي الصوت العالي ، حد بيزعق ، أصوات حيوانات معينة ، ناس غريبة ، دوشة

يعرف يشاور على أجزاء جسمه لما تقوليله فين مناخير ، فين عين ؟

يعرف يشخبط وله طريقة في مسكة القلم هنبقى نتكلم عنها في المهارات الحركية

يشاور على نفسه لو اتسأل فين ( اسمه )

ممكن يمسك كتاب ويقلب فيه وبعدها يأكله

خليه يجرب تجارب جديدة ويكتشف في بيئة آمنة واشرحي له

زي السلم ازاي بنطلع عليه وازاي بننزل عليه

لعبة معينة ازاي نلعب بها

متنسيش تنمي التفكير الإبداعي بإنك تسبيه يلعب بالطريقة اللي يفضلها

يعني لو مكعبات بنحطها فوق بعض وهو اخدها حطها جنب بعض أو بشكل معين ده كده طريقة مختلفة يعني إبداع

اللعب الحسي واللعب بالدقيق والعجين وحاجة البيت من الحاجات المفضلة لهم ، ممكن تعملي صلصال بيتي بمقادير آمنة له وهدوم مخصصة للأعمال الفنية ومشمع كبير وتكوني جنبه طبعا عشان متلاقيش الشقة كلها معمولة بالصلصال وممكن تعملي ألوان بألوان الطعام بس طبعا تاخدي بالك عشان متبقاش الشقة كلها ابداع