طفل السنة اعلمه ايه ( المهارات الحركية )

من سنة لسنتين .. يعرف ايه واعلمه ايه ؟

المهارات الكبرى

من سن سنة لسنة ونص بيبدأ الطفل يمشي ( بعد السن ده لو ممشاش لازم كشف عند الطبيب )

في بداية المشي بتكون رجليهم بعيد عن بعض وبيميلوا وهما بيمشوا وايديهم بيستخدموها عشان يتوازنوا ومبيعرفوش يعدوا التحديات البسيطة زي تجعد في السجادة أو حاجة مش مستوية

بعد شهرين أو ٣ شهور من التدريب على المشي يقدر يشيل حاجة في ايده وهو ماشي ويقدر يجر لعبة وهو ماشي ويمشي للوراء وممكن يرمي كرة وهو ماشي

بعد ٦ شهور من المشي يقدر يوصل للمشي السليم ويقرب بين رجليه ويقدر بمساعدتك يطلع وينزل السلم لكن لوحده هيزحف وهو طالع

يقدر يقوم من وضع الجلوس ويقف

يبدأ التسلق على أثاث المنزل

يقدر يقعد على كرسي صغير لوحده

بيحبوا لعبة الحصان الهزاز لكن بمساعدتك طبعا

في نهاية السنة دي هنجري كلنا وراه

هيقدر يجري بإتزان أكثر ومرحلة الاكتشاف هتوسع مننا

لو وقعت منه حاجة يقدر يوطي ويجيبها ويكون متزن

يرمي كرة ويشوط الكرة ويدحرجها بالتقليد لو عملتي كده ادامه

يقدر يشيل لعبة كبيرة أو لعب صغيرة

الحركات الصغرى

من سن سنة بيبدأ الطفل يميل لاستخدام يد عن يد ، في أطفال بيفضلوا اليد اليمنى وفي بيفضلوا اليد اليسرى

متجبرهوش على استخدام اليد اليمنى وفي الأكل نحاول عملا بالُسنة لكن لو معرفش نسيبه ومنضغطش عليه

يقدر يلقط أي حاجة صغيرة فتافيت من الأرض ماشي ورق صغير متقطع مناديل هو يقطعها وبعدين يلمها

يحط مكعبات في علبة ويطلعهم من العلبة

يشد لعبة ويجرها وهو ماشي

يكبش بإيده أي حاجة حبوب مثلا وأي حاجة يعرف يكبشها

يعرف يلف أغطية الزجاجات ويفتحها ويقفلها فخلي الزجاجات فاضية طبعا

يعرف يفك ويركب مكعبات فوق بعض

بعرف يقلب صفحات كتاب ويشاور على الصور اللي عارفها

بازل القطعة الواحدة بمقبض ومن غير مقبض مناسب من سن سنة بداية من بازل الدائرة والمربع والمثلث وبنتدرج في البازل معاه كل ما يتقن حاجة بننقل للمستوى اللي بعده ( بازل قطعة واحدة بمقبض وبدون مقبض – بازل كذا قطعة منفصل بمقبض وبدون مقبض ، بازل مراحل النمو ، بازل مجزأ قطعتين ثم ثلاثة ثم ٤ وهكذا )

بيحبوا يشخبطوا ، في السن ده بيمسكوا القلم مش يكتبوا لا طبعا بيمسكوه بالكف كله عشان يشخبطوا فلو عنده ميل لده وفري له أدوات أو سبورة سحرية والقلم يكون كبير شوية مش رفيع وبالتدريج مسكة القلم هتتحسن

يقدر يتسلق كرسي الكبار ويقعد عليه

بيتعلم في السن ده الصب الجاف وهو صب الحبوب من كوباية لكوباية ، من دورق بلاستيك لكوباية

مهم طبعا البيئة والأدوات تكون آمنة للطفل ويكون ادام عينك لأن السن ده لسه بيكتشف ببقه