قصة حياة

السلام عليكم ورحمة الله وبركاته

النهاردة هنشارككم حكايتنا ومنين جت فكرة أكاديمية حياة

إحنا 3 أصدقاء عارفين بعض ييجى كده من 17 سنة على عتبات كليتنا الحبيبة كلية التربية جامعة الإسكندرية .. 17 سنة مروا وحقيقى مش عارفة مروا إزاى ؟!

واحدة فينا اتخصصت موهبة وإبداع وبتحضر ماجستير دلوقتى ربنا يوفقها

وواحدة اتخصصت فى مجال الإستشارات التربوية وتعديل السلوك

وأنا اتخصصت فى المجال الأكاديمى تحديداً تدريس اللغة الإنجليزية والترجمة الحرة

ومع أول بيبى عندى وأول بيبى عند صديقتى الإستشارية التربوية ..أنا وصديقتى الإستشارية التربوية انشغلنا بالبيت والولاد والشغل اللى بنقدمه قليل جداً بالنسبة للمسئوليات اللى ورانا ولكن عمرنا ماوقفنا نشتغل على نفسنا ونتابع الجديد ومازلنا اللهم لك الحمد

جت صاحبتنا الثالثة قالتلنا مش كفاية بقى قعدة عالكنبة خسارة عندكم كتير تقدموه وولادكم كبروا شوية وتقدروا بعون الله تعملوا حاجة وحماس حماس طول الوقت بتحمسنا وتحفزنا كل واحدة لوحدها الله يرضى عنها ..

وسبحان الله لقيتنى فجأة بقول لصاحبتى الإستشارية التربوية ماتيجى نعمل حاجة سوا مختلفة وصلينا استخارة وقولنا يلا على بركة الله

هى كانت محضرة سلسلة اسمها أعلم ابنى ايه؟ قولنا نحولها لخطة عملية للأمهات نسهل عليهم ونسهل على نفسنا تربية الولاد وتعليمهم ونعملهم خطة مش بس تربيهم وتعلمهم لاء خالص دى خطة حياة نغرس فيهم كل يوم حاجة وفى نفس الوقت نساعد باقى الأمهات اللى مشتتة وتايهة بين المصادر

وبالفعل عملنا خطة شاملة بتوفيق ربنا شاملة 13 جانب من حياة الطفل ( الإيمانية – الإجتماعية – الحركية – الصحية – العقلية – الحياتية – العملية – الثقافة العامة – الآداب والقيم – اللغة العربية – اللغة الإنجليزية – التاريخ الإسلامى) وقررنا نبدأ بالمرحلة العمرية اللى فيها عمر أولادنا واتفقنا هنجرب عليهم الأول وبدأنا بالتحضيرات

من أول اللوجو والصفحة والأسم و أنشأنا موقع بنفسنا بدون أى مساعدات خارجية وصممنا فيديوهات للأطفال والأمهات بنفسنا وخاصة بمنهجنا بس

وكنا مش هنبدأ خالص لحد ماالبرنامج كله يكون خلص تحضيره كتصميمات فيديو وكده ولكن لما حصلت أحداث 7 أكتوبر اللى أثرت فينا جداً وشوفنا ثباتهم وصمودهم وعقيدتهم الراسخة هناك قلنا لازم نبدأ فوراً ويكون لنا دور

لازم نسعى ونساعد كل أم تربى وتعلم طفل بأمة وجعلنا شعار أكاديمية حياة ” نبنى حياة طفل بأمة”

والحمد لله يوم بعد يوم الفريق بيكبر وربنا رزقنا باللى ساعدنا وصممنا موقع احترافى أكتر وأسرتنا بتكبر بيكم يوم بعد يوم

ونتمنى نحقق الحلم ونساعد كل أم فى كل مكان فى العالم تربى طفل بأمة

دعواتكم لينا بالتوفيق والسداد

مازلنا على خط البداية نقف

ولو عاوزين تعرفوا عن برامجنا راسلونا عبر رسائل صفحتنا على الفيس بوك

https://www.facebook.com/Hayatacademyteam?locale=ar_AR

والسلام عليكم ورحمة الله وبركاته

دعواتكم