كيف اختار أنشطة طفلي .. 3 خطوات

الأنشطة كتير .. مش عارفة اختار ايه لابني ؟

النشاط ده مناسب لابني ولا لا ؟

ازاي اختار ألعاب وأنشطة مناسبة لسن ابني ؟

طيب ازاي بنحدد الأنشطة والألعاب المناسبة للطفل ؟

أهداف المرحلة العمرية

يعني الطفل المفروض يعمل ايه في السن ده وعلى أساسه بشوف الأنشطة المناسبة للهدف

مثلا الطفل في عمر سنتين بيتعرف على الألوان

فهحط أنشطة خاصة بالهدف ده ببدأ كل أسبوع لون

وابدأ احط الأنشطة بتاعتي النهاردة ناخد سلة اللون الأحمر ، بكرة ناخد نشاط فني ونلعب بألوان ماء باللون الأحمر ، بعده ناخد نشاط حركي عيدان حمراء ونغرسها في فلين أو حاجات حمراء على الأرض معروفة للطفل ونجري نجيب اللي نقول اسمه ، نشاط حكي ونحكي قصة عن اللون الأحمر وفي موقع Pinterest في أفكار كتير جدا للأنشطة

احتياج الطفل

يعني الطفل دلوقتي محتاج يتعلم حاجة معينة أو متأخر في حاجة معينة

متأخر حركيا يبقى هتكون الأولوية للأنشطة الحركية

متأخر لغويا يبقى الأولوية للأنشطة اللغوية

بحدد هعلم ايه بالضبط وبحط النشاط على أساسه وطبعا لو في تأخير كبير بيتشخص ويتقيم و بيكون تحت إشراف المتخصص

نمط الطفل

في أطفال بتفضل تتعلم عن طريق السماع ( نمط سمعي ) فبنزود الأنشطة السمعية مع باقي الأنشطة

في أطفال بتتعلم عن طريق البصر ( نمط بصري ) فبنزود الأنشطة البصرية

في أطفال بتتعلم عن طريق اللمس ( نمط حسي )

في أطفال بتتعلم أفضل وهي بتتحرك ( نمط حركي ) فبزود الأنشطة الحركية

في أطفال بتتعلم لوحدها ( نمط فردي )

في أطفال بتتعلم لما يكون مع أطفال (نمط إجتماعي )

اهتمام الطفل

في السن الصغير ممكن ننتبع اهتمام الطفل

مثلا مهتم بشد المناديل بوفرله أنشطة فيها شد

ورق في صندوق ، ورق كروشيه ملون مطبق زي المناديل

مهتم بالفيش وإنه يدخلها في الكوبس بوفر أنشطة بديلة لها نفس الحركة

الطفل مهتم بالقراءة بوفر له قصص وكتب مناسبة لسنه

الطفل عنده شغف بالعربيات بجيبله عربيات ولو عاوزة احببه في القراءة بجيبله قصص عنها وبعرفه أنواعها ولو عاوزة نشاط إدراكي وحركي اجيبله بازل عربية وميكانو عربية وهكذا

دي أسس عامة تساعد أي أم في اختيار أنشطة طفلها وبالتجربة الأم بتوصل بسرعة للأنشطة المناسبة لطفلها