نفسية طفلي .. خط أحمر !

كلمتين نفسي اقولهم من زمان ولاحظتهم الفترة دي جدا حتى من المقربين والأمثلة كتير لكن هذكر بعض منها

أم متوترة طول الوقت لأنها خايفة على نفسية الطفل لما حد في العيلة اتوفى

أم وصلت لمرحلة صعبة من التوتر لأنها خايفة تفطم ابنها عشان ميتأثرش نفسيا

أم بتغلط في الناس عادي عشان نفسية ابنها

أم مش راضية تعدل بين طفلين خوفا على نفسية الطفل الأول

أم حملت رافضة حملها خوفا على نفسية بنتها

كفاية يا جماعة

نفسية الطفل مهمة لكن الأهم تكون تحت مقياس الدين

هيفيد بايه إني احافظ على نفسيته وانسى بناء شخصيته ؟

ربنا ذكر أمر الفطام وإن كان نفسيا أمر صعب فابن القيم اتكلم عن الفطام التدريجي اللي به يكون أهون على نفسية الطفل

لكن مينفعش منفطمش الطفل مثلا عشان خايفين على نفسيته بالعكس الفطام أمر صحي جدا في بناء شخصية الطفل

والدنيا كده فيها صعوبات مش سهلة ومع كل خطوة الطفل بيتعلم ده بما يناسب سنه وبيتفك التعلق واحدة واحدة

امال ازاي هيكون مستقل ومسلم قوي وهو لسه معتمد علينا بشكل كامل ؟ ازاي هنربي مسلم يعمر الأرض واحنا لسه عاوزينه مرتبط بينا طول الوقت ؟

أمر الموت حوالينا كل يوم وبنأهل الطفل له من عمر ٣ سنوات بتربية حيوانات أعمارها قليلة وبنتعامل مع الأمر عادي بدون خوف وتهويل

على أيام الرسول صل الله عليه وسلم هل كانوا بيخبوا الأطفال ؟ ولا كانوا بيحضروا الجنائز ؟

هل لما الرسول صل الله عليه وسلم اتوفى مش اتذاع خبر موته ولا خبوه على الأطفال خوفا على نفسيتهم

يعني اغلط في الناس وابني أو بنتي اللي غلطانين ؟

الرسول صل الله عليه وسلم لما لقى طفل اخد تمرة وهي من الصدقة قاله كخ كخ مقالش ده طفل يا جماعة مبيفهمش سيبوه !

قال لو فاطمة بنت محمد سرقت لقطعت يدها مقالش دي بنتي محدش يقربلها حتى لو غلطت

الدين يا جماعة ، والقيم والمبادئ

حافظوا على نفسية أولادكم بس متخلوش حفاظكم على نفسيتهم تنسيكم الدين والقيم تنسيكم هدفكم من تربيتهم تنسيكم أنتوا هنا ليه وهما هنا ليه !

النفسية مهمة لكن في حاجات تانية أهم احنا بدأنا ننساها ..

وإنا إليه راجعون ..

اللهم اعفو عنا واسترنا وأعنا على تربية أولادنا كما يرضيك فإننا لا حول ولا قوة إلا بك

Blog