الأنماط السلوكية ( الحذر الحساس )

والنهاردة ميعادنا مع النمط الثالث 🌸

قبل ما اتكلم عنه في سؤال جالي وحبيت اجاوبه هنا على العام لأنه مهم يكون واضح لكل الأمهات
انهه شخصية أفضل؟ مفيش شخصية أفضل من التانية
كل شخصية جميلة بمميزاتها وعيوبها زي ما هي ، احنا بنعرف نمط الشخصية عشان نفهم تصرفات ولادنا ونقدر نتعامل صح معاهم وعشان مندخلش في مقارنة بينه وبين أي حد تاني فنكسر شخصيته

النوع الثالث بقى الحذر الحساس

⁦1⃣⁩⁦ طفل حساس ورغم عيوب الحساسية اللي بتشتكي منها الأمهات إلا أن لها مميزات قوية فهو حساس جدا لمشاعر الناس ويقدر يحس بهم من غير ما يتكلموا ومتعاون وحنين جدا جدا 💙

⁦2⃣⁩بما إنه حساس فهو بينزعج جدا من الزعيق وبيتوتر من الصوت العالي ومع الصدمات النفسية بينسحب فالتعامل معاه محتاج هدووء ، الزعيق بيوتره ويخوفه ويخلي عقله حرفيا يقف ، بما إنه حساس فهتلاقيه بيعيط كتير😭 بلاش جمل من نوعية ” ايه النكد ده ، أنت عيوطة، متعيطيش، الرجل ميعيطش ” لأنها بتطلع لنا شباب قاسي مش بيراعي مشاعر حد ، وبما إنه حساس فحواسه حساسة بيضايقه الضوء القوي 🔦 والصوت العالي🔊 وبعض الروائح وبعض الأطعمة وبعض الملامس وخاصة الخشنة

⁦3⃣بيحب الروتين وبيخاف من التغيير
يعني يحب يومه يكون ماشي زي ما متوقعه ، حاجته مترتبة بالطريقة اللي تريحه ، ينام في وقت محدد ..أي تغيير بيضايقه جدا

⁦⁦4⃣⁩مبياخدش على الناس بسهولة ومش هتلاقيه راح سلم من نفسه وممكن جدا أكثر الوقت تلاقيه لازق فيكي فجمل زي ” قوم سلم ، قوم العب ،اتحرك ..” مش هتجيب معاه فايدة لكن هتضغطه هو بيحب ياخد وقته لغاية لما يتأقلم على الشخص وبعدها ينطلق
ممكن تجربي تديله اقتراحات وسبيه ياخد وقته

⁦⁦5⃣⁩⃣⁩مش بس مع الأشخاص كمان مع الأماكن الجديدة هتحسيه خايف منزوي مش راضي يتحرك من مكانه حاسس إن كل الناس بتبص عليه متضغطيش عليه وسبيه شجعيه هو هياخد وقته وبرده ينطلق

⁦⁦6⃣⁩⃣⁩ دول الأطفال اللي نومهم خفيف مهما اتسحبتي بشويييش وعملتي حركات لولبية عشان ميصحاش بتلاقيه بيصحى 😒

⁦⁦7⃣⁩⃣⁩ذكي ، قبل ما بيقدم على حاجة بيبص عليها من كل الجوانب ويتفحصها ويشوف عواقب الأمور وبعدها ياخد قرار وعشان كده بيتفهم غلط إنه جبان أو اتكالي فنلاقي ” الأم النشيطة ” تاخد القرارات بالنيابة عنه فتعوده على الإتكالية فعلا

⁦⁦8⃣⁩⃣⁩بيخاف إنه يكون غلطان وده بيوتره كتير لما يدخل على أي تجربة ومع ذلك ميزته إنه بيعمل أفضل ما عنده

⁦⁦9⃣⁩⃣⁩صعب يكون صداقات بسرعة ولو كون بتكون قليلة وبيكون درسها كويس عبال ما يتأقلم عليها وده بياخد منه وقت كبير جدا

⁦🔟⃣⁩ بيتحسس من ملمس الملابس لو خشنة أو مش مريحة له
⁦

🔷طيب ازاى اتعامل مع الشخصية دى ؟؟

👈 مفتاحه ” تقبل المشاعر ”
أي محاولة لرفض مشاعره بتخليه يغضب بسرعة
اتقبلي مشاعره حتى لو حاجة تافهة في نظرك بعدها هتلاقيه هدى وبدأ يتقبل وجهة نظرك

👈 اديله فرصة يتأقلم مع أي شخص أو مكان أو أكل أو وضع جديد ومتضغطيش عليه

👈 ابعديه عن مصادر الازعاج ،الصوت العالي لإن ده بيوتره
لو مش بيحب الصوت العالى >> خلي المكان هادي ولو حضانة أو مدرسة علميه يتعامل مع الصوت العالي فيها
لو مش بيحب الحاجة الخشنة >> دورى على ملابس ناعمة له

👈 ومع ذلك متمنعوش من التجارب الجديدة عشان يكتسب خبرة ومهارات وكل ده من غير ضغط وهيأيه لده الأول

👈 علميه إن عادي نغلط المهم نتعلم ونصلح غلطنا

👈علميه أسماء المشاعر وخليه يتقبل مشاعره مينكرهاش وازاي يعبر عنها و يديرها صح

👈علميه مهارة التفكير المنطقي وخاصة التحليل عشان يقدر يتعامل مع المواقف المختلفة ومع مشاعره

ابنك بيشوف العالم بشكل مختلف وبيحس بشكل مختلف ..تعاملى بذكاء مع طفلك 🙂

🌸🌸لو ده نمط طفلك قوليلنا ايه الصعوبات اللي بتواجهك معاه ؟

 

 

#أمومة_واعية
#أكاديمية_ماما