طفلي والكورونا ( أنشطة عملية )
في ظل الأزمة اللي بنمر بها كلنا قلقانين ومتوترين وأولادنا بيلاحظوا ده وبيتعلموا منا
ورغم الوضع الصعب إلا إن كل حدث هو فرصة بنتعلم منها ونقرب به لربنا سواء فهمنا حكمته أو لا
وفي كل موقف بيمر علينا بنتعلم منه وبنعلم أولادنا
ولأن اتطلب مني أفكار لتعليمها لأولادنا قررت اعملكم ألبوم خاص ونعرف مع بعض
ازاي نستثمر الأحداث اللي بتحصل في تربية أولادنا
تربية إيمانية .. نفسية .. إجتماعية .. صحية
كل يوم بأمر الله هيكون في نشاط بسيط نعمله مع أولادنا
الأنشطة مناسبة من عمر ٣ سنوات فما فوق
وفي أنشطة هتكون مخصصة أكثر للسن الكبير
على حسب فهم وإدراك الطفل بنبسط المعلومة
—————————
نشاط 1
جبنا المطهرات والكمامات
دورنا على الكحول في كل الصيدليات
يلا يلا عقم الشقة كلها، انقع الفاكهة والخضار في الخل
وامسح الاكر والباب ،ياربي نسيت ارش كل حد داخل ، اغسل ايدك بالصابون يا حبيبي ، يلا خد دش دافي ، مفيش سلامات على حد ، البس الكمامة ،رش كحول لما تمسك حاجة ، اممممم ايه تاني
صحيح نسيت الأكياس انظفها ، طيب العيش اللي لسه جايبينه اسخنه ، طيب العلب ..طيب …. طيب …. ياااا ايه كل ده نسيت ايه تاني !!
معاناة الأمهات اللي بدأت من أول ما بدأ فيروس كورونا في الانتشار حاسة بكِ
لكن مع حالة الفزع والقلق والتوتر اعتمدنا على الأسباب كأنها كل حاجة بل البعض منا وصل لحالة من الوسواس اللي أرهقته نفسيا ونسينا إن احنا عمرنا ما نقدر نعدد كل المخاطر اللي نقدر نحتاط لها وده من كمال رحمة ربنا بنا عشان منوصلش للوسوسة ، فمن حكمة ربنا إن يكون في مخاوف عشان نلجأ عليه ونتوكل عليه حق التوكل
نسينا المعنى ده و نسينا نعلم أولادنا إنهم ياخدوا بكل الأسباب المتاحة كأنها كل حاجة لكن نتوكل على الله كأن الأسباب دي ولا حاجة
ازاي ابدأ مع طفلي ؟
بعد ما بنحكي لهم قصة الفايروس وعرفناهم عليه وازاي نحمي نفسنا منهنردد عليهم ” ربنا أمرنا ناخد بكل الأسباب اللي نقدر عليها يا حبيبي لكن متنساش مين اللي بيحفظنا ؟ ايوه ربنا “لو احنا قدرنا على كل حاجة هنستغنى عنه ولو كل حاجة كانت صغيرة وبسيطة مش هنحتاج لربنا واحنا ضعاف أوي من غيره
ممكن نستعين بأمثلة وقصص بسيطة– يعني الطيور والحيوانات لازم تروح تدور على رزقها وتاخد بالأسباب وربنا هو اللي بيرزقها
المعنى ده من أهم المعاني اللي تغرسيها في طفلك مش بس في الأزمة بل في حياته كلهاوعشان نبدأ صح جبتلك تطبيق بسيط لكِ قبل ما تبدأي مع طفلك 
هنقرأ اسم الله الوكيل ونعيش معاه عشان نقدر نوصله لأولادنا
وجبتلك لينك لإسم الله الوكيل ل د.محمد راتب النابلسي تيسيرا عليكِ
ومتنسيش تدعي إن ربنا يعينك على تربيتهم .. واستعيني به ولا تعجزي
حصني أطفالك بذكر الله
مَا مِنْ عَبْدٍ يَقُولُ فِي صَبَاحِ كُلِّ يَوْمٍ وَمَسَاءِ كُلِّ لَيْلَةٍ بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ ثَلَاثَ مَرَّاتٍ لَمْ يَضُرَّهُ شَيْءٌ
(بسم الله) أي: أستعين، أو أتحفظ من كل مؤذ باسم الله (الذي لا يضر مع اسمه) أي: مع ذكر اسمه باعتقاد حسن، ونية خالصة (شيء في الأرض، ولا في السماء) أي: من البلاء النازل منها (وهو السميع) أي: بأقوالنا (العليم) أي: بأحوالنا
زي ما مناعة جسم طفلك مهمة ضد الفيروس فمناعته النفسية كمان مهمة
النهاردة هنلعب مع بعض لعبة المشاعر ونفصل شوية من جو الأزمة مع أولادنا ونقضي وقت ممتع ومفيد 
في ظل القلق اللي كلنا بنعاني منه ، أطفالنا بيلاحظوا ده وبيكتسبوه وكل طفل بيبدأ يعبر عن ده بشكل مختلف فتلاقي الطفل متعصب أو بيعيط أو بيصرخ أو بيعمل سلوكيات مزعجة ونبقى محتارين مش عارفين هو بيعمل كده ليه
الحقيقة هو مش عارف هو حاسس بايه ولا ازاي يعبر عنه صح !
عشان كده هنلعب اللعبة اللطيفة دي 
هنجيب كروت لمشاعر مختلفة وممكن تطبعيهم من النت أو تكبريهم وتشتغلي من الموبايل لو مش متاح الطباعة هنحط الكروت كلها ونسحب كارت ونمثله وبعدها الطفل يسحب كارت تاني ويقول ” أنا حاسس ب إسم الشعور ” ويمثل الشعور ده وهكذا مع باقي الكروت وبنلعب معاهممع كل كارت هبدأ اعرفه ايه اللي بيحصل لما بنحس بده بعدها هنحط الكروت كلها ونسأل الطفل حاسس بايه دلوقتي ؟ ويسحب الكارت المناسبواذكر مواقف واسأل حسيت بايه في الموقف ده ؟
هنذكر الطريقة الصح في التعامل مع الشعوروجبتلكم لينكات جميلة جدا هتفيدكم في اللعبة دي
ده لينك لبعض المشاعر وبتحس بايه وازاي نتعامل وده لينك كتيب فيه ألعاب تانية للمشاعرألعبوا مع أطفالكم وعلموهم ازاي يعبروا صح عن مشاعرهم عشان تقوى مناعتهم النفسية
زي ما بنعلم الطفل ازاي يحافظ على نفسه ، لازم نعلمه إن له دور في المجتمع مع أخذ احتياطات الوقاية والالتزام بالبيت
ومع فترة الحظر في ناس كتير متضررة ، خلي ابنك يشوفك وأنتي بتتفقدي اللي حواليكي واللي تعرفيهم وبتساعدي بالمتاح وعلميه إن أجر ده عظيم عند ربنا
وعرفيه على جمال ديننا في تعاملنا مع اللي حوالينا وإننا منكنش أنانيين
مَثَلُ الْمُؤْمِنِينَ فِي تَوَادِّهِمْ، وَتَرَاحُمِهِمْ، كَمَثَلِ الْجَسَدِ الْوَاحِدِ، إِذَا اشْتَكَى عُضْوٌ مِنْهُ تَدَاعَى لَهُ سَائِرُ الْأَعْضَاءِ بِالْحُمَّى، وَالسَّهَرِ
وده ممكن حتى يطبقه في نطاق الأسرة أو دعم وتذكير من خلال النت أو من خلال الدعاء للأمة أو من خلال نقل علم اتعلمه للناس أون لاين وغيرها من الوسائل اللي يكون بها فعال في المجتمع من غير ما يضر نفسه
خليكي قدوة لابنك 
من الحاجات اللي كنا لاحظناها فترة الابتلاء هي النعم اللي مكناش واخدين بالنا منها وبدأنا نفقدها
وعشان كده نشاطنا النهاردة هو #ملاحظة_النعم
اسألي أولادك ايه أكثر حاجة افتقدوها الفترة دي ؟ عرفيهم إن دي كانت نعمة من ربنا أنعمها علينا علميهم دعاء الرسول صل الله عليه وسلم ” اللهم إني أعوذ بك من زوال نعمتك “ عددي معاهم النعم اللي ربنا وهبها لهم علميهم ازاي يشكروا النعمة ، وازاي يستخدموها في طاعة اللهممكن عن طريق القصص ، الأناشيد ، اللعب بالدور ، أو النماذج الواقعية
زي نعمة البصر : إنهم يغموا عينيهم لدقائق ويتخيلوا لو مكنش عندنا نعمة البصر أو السمع أو اليد أو الرجلوهكذا مع كل نعمة نعددها معاهم وازاي يقولوا الحمد لله من قلبهم وازاي يستخدموا النعمة دي في طاعة ربنا
النشاط ده من أهم الأنشطة اللي بتغرس القناعة في الطفل وبيقدر قيمة النعم في حياته وازاي يحافظ عليها
كنت في عيادة الدكتور ومعانا بنوتة صغيرة لابسة كمامة وكل شوية يا عيني تلعب في الكمامة اللي مش متعودة عليها دي ومن الزهق تلمس اللي ادامها ومامتها تتعصب وتزعق
اتعاطفت مع البنت جدا في حبها لحرية الحركة من غير تقييد بفطرتها وهي مش فاهمة كمية الحاجات اللي اتفرضت عليها فجأة ومخلية الأم متوترة بالشكل ده زي ما تفهمت خوف الأم عليها ومحاولتها المستمرة لحماية طفلتها الله يكون في عونها
لكن المشكلة إن الأم هي اللي قامت بكل إجراءات الوقاية من غير ما تعلمها ( ليه ) و( ازاي )
( ليه ) هو السؤال اللي الطفل لازم يلاقي له إجابة
ليه بيغسل ايده لما يلمس حاجة ليه بينظف هدومهليه ميلمسش وشه وهو برة البيت ليه بيلبس كمامة ليه بيقلع جزمته على البابفي التوعية بنفهم الطفل بشكل ميسببش له هلع بدون تهويل أو تهوين ضرر الفيروس و ليه بنعمل إجراءات الوقاية دي وعلى أساسه الطفل هو اللي بيأمن نفسه مع متابعة من الأم لتذكيره لو نسى
لأنه طفل محتاج تكرار وتذكير بإستمرار
لأنه طفل من طبيعته الاكتشاف والفضول
وبنفكره إن النظافة جزء من دينا
وإن حفظ النفس مطلب شرعي
وطبعا مننساش نعلمه التوكل على الله
( ازاي ) هو الجزء التاني اللي لازم يتعلمه الطفل
ازاي يغسل ايده بالصابون بطريقة صح ازاي يلبس الكمامة بطريقة صح ازاي يخلع الكمامة ازاي يتعامل في الظروف الحاليةليه وازاي هي الأساس في تعليم الطفل أي قيمة وأي مهارة
وطبعا ندعي إن ربنا يحفظهم ويبعد عننا الوباء
مقالات قد تهمك ☺
طفل السنة اعلمه ايه ( التربية العفيفة )
يناير 13, 2025
طفل السنة اعلمه ايه ( المهارات الحركية )
يناير 13, 2025
طفل السنة اعلمه ايه ( التربية العقلية )
يناير 13, 2025