أطفالنا والحظر المنزلي

لو طفلك طول الوقت لازق فيكي وعاوز يلعب ٢٤ ساعة وأنتي مش عارفة تعملي معاه ايه أو عندك مسئوليات تانية

النهاردة جبتلك ٥ خطوات هيساعدوكي عشان طفلك يتعلم يلعب لوحده

مع فترات الحظر المنزلي الأولاد بقت معانا طول الوقت ، في أطفال ممكن يلعبوا لوحدهم ، وفي أطفال طول الوقت عاوزين الأم تلعب معاهم وده بيخليها في حيرة ما بين مسئولياتها ودراستها لو بتدرس أون لاين وبين طفلها

لو طفلي عاوز يلعب معايا طول اليوم اعمل ايه ؟

استراتيجية الانسحاب التدريجي يعني ايه ؟

يعني بقعد عادي ألعب معاه وبعدها بستأذنه ٥ دقائق وبقوله كمل الحتة دي عبال ما اروح اجيب حاجة واجيلك وارجع اشجعه لو خلص ده

وبالتدريج بزود المدة اللي بسيبه فيها لوحده ومتنسيش التشجيع

الروتين

من أهم الأدوات عشان الطفل يبقى يومه مترتب ومدي قيمة لكل حاجة

خلي له روتين في اليوم وممكن تقسمي الروتين مرتين أو ٣ مرات

روتين صباحي أول ما يصحى من النوم

روتين مسائي قبل ميعاد النوم

روتين بعد الغدا

الروتين من أكثر الوسائل الفعالة للطفل واللي بتخليه ينظم يومه

أداة تنظيم الوقت

اشتغلي على مهارة تتظيم الوقت بشكل مبسط بما يناسب سنه فيقدر وقته ويعرف إن في وقت للعب ، وقت للغدا ،وقت للأسرة وهكذا وممكن نعمل نشاط الساعة من ورق كرتون ونقسم كل وقت ونلونه بناء على مهام اليوم ونعلقها وتبقى ادامه طول الوقت ونراعي التوازن بين مجالات التربية

اللعب الحر

وهو اللعب اللي الطفل فيه مش ملزم بقواعد وبينمي مهارة عقلية أساسية وهي الإبداع

زي ألعاب الفك والتركيب ممكن تتعمل بأنماط مختلفة

الألعاب الفنية من الرسم التلوين

ألعاب التشكيل من العجين والصلصال

ألعاب التمثيل وتقليد الأصوات

وبرده بستخدم أداة الانسحاب التدريجي ومبعرضش عليه مساعدة بتفرج عليه بس ولو سألني بقوله جرب تاني ، حاول لوحدك هتعرف تجيبها ولو لقيته مش عارف خالص بعرض مساعدة في شكل اقتراح بس ايه رأيك لو تحط دي هنا تفتكر هتبقى أفضل ؟ ممكن نعمل ده كده ايه رأيك ؟ بحيث بخلي القرار النهائي له

وقت ماما

بفهم الطفل إن زي ما في جدوله اللي عملناه فوق وقت له مع ماما ففي وقت لماما عشان تخلص اللي وراها وبسأله ايه اللي ممكن تعمله في الوقت ده لوحدك من غير ماما لغاية لما اخلص ؟

يعني ممكن يقعد يتفرج عليكي بس بهدوء

يرسم أو يلون لغاية لما ماما تخلص

يلعب لعبة بيحبها جنبك بس لوحده وبهدوء

واسمعي منه وزودي اقتراحاته لغاية لما توصلوا نقطة مشتركة

وراعي إن هو طفل مش سهل يلتزم بده من أول مرة ومفيش مانع من إننا ناخد دقيقة بريك نشجعه ونطمن عليه

مع مراعاة

الطفل اللي لغة الحب عنده ( المشاركة ) والطفل اللي بيحب الونس يحب وجود مامته حتى لو مش بتلعب بس هي معاه وحواليه وده بشركه معايا حتى في أعمال البيت ، الطبخ ، تحضير الأكل بما يناسب سنه عشان اشبع احتياجه

الطفل يكون في الأصل عنده ثقة بنفسه وبيعتمد على نفسه وله مهام بيعملها لوحده من غير ماما مش كل اعتماده عليها وبيحتاس لما يعمل حاجة لوحده

مجتمع بديل

ده صعب حاليا بسبب الحظر بس إن امكن تواصله ((أون لاين )) مع أولاد تانيين في سنه يشتركوا في أنشطة مع بعض و مع أولاد العيلة ده هيكون أفضل له