من حقك ..

أنتي مش بتدلعي

أنتي مش أم مقصرة

أنتي أم مجهدة

بتنامي بالعافية ومواعيد نومك اتظبطت على طفلك

بقيتي بتتمني متناميش على إنك تنامي نوم متقطع يتعبك أكثر وأكثر

حياتك كلها بقت مرتبطة بالصغنن

مبقتيش بتعرفي تعملي حاجة وهو صاحي

أنتي اللي بقيتي بتنامي من التعب والإجهاد مش عشان عاوزة تنامي

بتقومي بالبيت كله من طبخ وتنظيف وكنس وغسيل

بتراعي طفلك من غيار لاستحمام لرضاعة لاهتمام بتفاصيله

أنتي اللي بتسهري من قلقك عليه لما يكون تعبان

أنتي اللي خوفك بيزيد عليه يوم ورا يوم

بتفكي شفرة عياطه المستمرة

بتلاعبيه

وتربيه

وتنمي مهاراته

لما طفلك بينام مبتناميش زي ما قالولك ،بتقومي تخلصي اللي وراكي في البيت

بتضحي بنومك بليل عشان تاخدي ساعة لكي تشحني فيها طاقتك ليوم جديد

بتضحي بأهدافك وأحلامك عشانه لأنه بقى الأولوية

بتراعيه لما يكون تعبان وتهتمي بأدويته

أنتي اللي بتستحملي زن وقريفة وتعب

أنتي اللي بقيتي بتصلي وأنتي شيلاه عشان تقدري تركزي

أنتي اللي مبقتيش عارفة تقومي بإحتياجاتك طول ما هو صاحي

أنتي اللي بتخطفي وقت للنوم عشان جسمك يرتاح

أنتي اللي بتقرأي وتتعلمي كل يوم عشان تربي ابنك

أنتي اللي بتحاولي تحافظي على نفسيتك عشان متأثرش على طفلك

أنتي اللي بتستحملي كلام سخيف وتعليقات ملهاش لزمة

أنتي اللي لما بتقولي إنك تعبتي بتتحطي في مقارنات عقيمة ملهاش وجود لأن كل أم عدت باللي عديتي به

وبتعملي كل ده لوحدك بكل حب

لأنهم حتة من قلبك بل قلبك كله

لأن الجنة مش بالساهل وتستاهل تتعبي عشانها

من حقك تتعبي ، من حقك تفصلي ، من حقك ترتاحي وتطلبي دعم ومساعدة

أنتي قوية بالله ربك عالم بتعبك وهيجازيكي عنه خير لو احتسبتي عملك لله وهيكفيكي الناس المؤذية ويسخرلك اللي يدعمك نفسيا قبل جسديا .. اثبتي أنتي بتقومي بمهمة عظيمة وأمانة كبيرة بتربي طفل مسلم يوحد الله

كل الشكر لأمي ولكل أم